Tamang eee... Beta mau bilang, kalu di negara ini cuman ada dua saja. Penguasa Deng dikuasai.
Penguasa biking diri sumacam Tuhan, dong kuasain Katong pung hak sampe Katong mau makang jua dong batasi akang.
Tamang. Ale tau sandiri to. Kalu dong yang ada dudu pangku kaki itu, dong dapa kepeng capat saja, sanang saja. Seng sama Katong pung orang tatua yang tiap hari bajalang deng pacol di bahu, pikol hahalang, pegang pangayong, loleba, lai mau bakalai deng akang panas mandidi, balom lai tamba deng ujang.
Tapi dong yang penguasa itu. Dong cukup Dudu macam pesulap saja. Sim salabin abraka dabra, lai kepeng datang. Dong karja seng kuras tenaga macam katong orang tatua.
Tamang. Katong pung hak jadi dong pung hak. Katong dikuasai dari dong yang penguasa. Katong dapa marah dari dong yang penguasa. Balom lai Katong dapa kasi beban dari dong yang penguasa. Katong jua seng tau apa-apa, barang dong kira katong bodoh.
Tamang. Ale tau seng? Dong-dong yang balaga pake motor, oto bagus-bagus, sampe pesawat pribadi itu. Akang pung hasil dari sapa? Katong-katong ini. Tapi dong biking katong su macam orang asing di katong negara sandiri.
Tamang. Beta ada barapa kata par penguasa dong ini. Ale mau dengar kaseng?
"Jang sombong deng kamong pung harta. Barang itu rakyat pung karingat paleng banya di akang".
