Gesah Yusuf Dalam Kitab Suci Bahasa Dayak Kanyatan

Komentar Para Tokoh dan Pemimpin

Mantap! Ini bukan sekedar terjemahan kata-kata, tetapi sekaligus mengali kata-kata yang mengandung nilai sastra yang indah, sehingga alur kuminkasilebih enak dan “renyah”.

Saya setuju sekali dengan kata “Buah Malam”, Sekalipun bamimpi lebih umum digunakan, tetapi buah malam lebih menekankan mimpi yang memiliki makna atau arti yang jelas. Kata-kata lain yang saya suka sekali:

-Kurus kurengkekng artinya kurus sekali (41:3)

-Mangka’ cagir badiri artinya berdirinya mantap (41:3)

-Paramu-paremah ayapm pangidup (46:1) ini adalah sastra Kanayatn yang indah sekali, untuk mengambarkan pemberian yang luhur.

Pdt. Mesakh Amen, S.Th

Gembala GPPIK Bukit Zaitun Pontianak

Adil ka’ talino, bacuramin ka’ saruga, basengat ka’ Jubata. Bakomo’ diri’ bapakat, bajalatn diri barage ngago’ maraga idup nang bujur!

Gereja Kalimantan Evangelis (GKE) sidi miah repo kade’ ada maraga idup nang dinyontengan ka’ kata diri’ Dayak Kanayatn.Contengan nian lea balo nang nangkahi idup diri’, baya jaji pituah gagas ka’ paridupatn talino Dayak Kanayatn ampeatn man ka’ ananya. Biar urakng diri’ talino Kanayatn jaji paramu-paremah nang idup, manjawat ati Jubata repo!

Pdt. Alox Dasilelo, MA, M.Th

Ketua Resort GKE Karangan, Kalbar

Selamat untuk kelarnya proses penerjemahan Kisah Yusuf ke dalam bahasa Dayak Kanayatn, semoga segera menyusul terjemahan lainya. Pada prinsipnya kami menyambut baik hasil terjemahan ini karena dapat membantu mengefektivkan pemberitaan Injil dan proses “men-Dayak-kan” nilai-nilai Kristiani dalam kehidupan masyarakat adat Dayak Kanayatn khususnya.

Pdt. Sucipto, S.Th.

Ketua I Sinode GPKB Kalimantan Barat

Cerita tentang Yusuf adalah cerita paling hidup dan menarik dalam Perjanjian Lama. Di dalamnya kita akan dapat belajar bahwa berbagai situasi dan kondisi yang terjadi dalam kehidupan kita ternyata dipakai Tuhan untuk membentuk kita menjadi pribadi yang kuat dan matang dalam melaksanakan rencana-Nya. Hal ini kita bandingkan juga dengan pengalaman iman Rasul Paulus dalam Roma 8:28 “Kita tahu sekarang bahwa Allah turut bekerja dalam segala sesuatu untuk mendatangkan kebaikan bagi mereka yang mengasihi Dia, yaitu bagi mereka yang terpanggil sesuai dengan rencana Allah.”

Karena itu, kami sangat bersukur dan mendukung diterbitkannya buku “Gesah Yusuf”.Kiranya buku ini dapat terus memotivasi setiap penutur asli bahasa Dayak Kanayatn untuk dapat melihat rencana Allah yang mendatangkan kebaikan dalam kehidupan mereka. Kemulian hanya bagi Allah!

Pdt. R.O. Rampala Gembala Sidang GPIB Panitah Anjongan

Yusup man na' Kamar Kapalanya

1 Yakop badiapm ka’ binua Kana'an, jukut dohoya ia nuna’an na’ pa'nya jaji urakng atakng. 2 Nian gesah piturutn Yakop. Taka’ koa Yusup gi’ baru’ mangkat bujakng, omornya tujuh balas tahutn. Karajanya man na’ aka’nya panganak Bilha man Silpa we’ tere’nya, pamihara kambing-domba. Na’ aka’nya kaja muat kajahatatn, tagal koa na’ aka’nya dinya ngaduatni' ka’ pa'nya. 3 Yakop nang damanya uga’ Israel ngalainan  Yusup man na’ aka’nya, ia uga’ miah labu ka’ Yusup, jukut Yusup koa dinya maranakatn taka’nya dah tuha. Yusup dinya  manjawatatn  pahiak jubah nang miah edo’. 4 Taka’ dina' kamar kapalanya nele’ kade’ pa’nya balabih labunya ka’ ia, na’ aka’nya jaji busak ka’ Yusup, tagal koa na’ aka’nya kaja bakata kasar ka' ia. 5 Nda arinya, taka' koa Yusup ngalap buah malam. Buah malam koa dinya ngesahatn ka’ na’ aka’nya, tagal koa na’ aka’nya sia’ busak ka’ ia. 6 Buah malamnya koa di-Yusup ngesahatna ka’ na’ aka’nya, ja katanya, “Dikita’ dangaratn gesah buah malamku nian; 7 Diri' tagah nengo'i' tangke gandum taka' bahanyi ka’ uma. Tangke gandum nang diku nengo' koa da’ bacagatatn, baru' nang dikita’ nengo'i' da' ngulilikngi’ nu’ ku, tagogo' nyambah tangke gandum nang diku nengo' koa.” 8 Ja na’ aka’nya nyahuti’nya, “Menah kao nang jajia’ raja nang marentaha’ kami!” Tagal dibuah malam nang dinya ngesahatn koa, na’ aka’nya sia’ miah busak ka’ Yusup. 9 Ari sote’ Yusup ngalap buah malam agi’. Buah malam koa dinya ngesahatn ka’ na’ aka’nya, “Diku nele’ mata’ari, bule’ man sabalas bintakng, tagogo' nyambah ka’ aku.” 10 Buah malamnya koa dinya ngesahatn uga’ ka’ pa’nya, tagal koa pa’nya bera ka’ ia. Ja pa’nya ngatai’nya, “Buah malam ahe ge’ nu’nyu koa? Nda ge’ na’ pa’-we’nyu man na' kamar kapalanyu nyambaha’ kao?” 11 Au’ tagal koa na’ aka’nya jaji teget ka’ Yusup, pa’nya ihan ja’ nang nohatni’ gesah koa ka’ atinya.

Yusup Dinyual ka’ Nagari Maser

12 Nda arinya, taka’ na’ aka’ Yusup gi' tagah ngirikng kambing-domba na’ pa’nya ka’ kampokng Sikem, 13 Israel bakata ka’ ia, “Na’ aka’nyu gi' tagah nungui' laok ayaman diri’ ka’ kampokng Sikem, tagal koa da’ ampusi’ na’ aka'nyu.” Ja Yusup nyahuti’ pa’nya, “Au’ pa’a." 14 Ja Israel agi’ ka’ ia, “Tah mpahe na’ aka’nyu ka’ kampokng Sikem, diri’ gi’ nana’ nau’an mpahe na’ aka’nyu ka’ naun. Gagas dehe’ dinyu ampusi' na’ aka’nyu, biar diri’ nau’an mpahe kambing-domba diri’ ka’ naun.” Yusup da’ batulak mpat ka’ tabuk Heboron. Ina’ lama laka’ koa ia namus ka’ kampokng Sikem. 15 Taka’nya namus ka’ mototn rumput, Yusup ulakng-ale’ ngulilikngi’ abut koa, ia batamu man urakng nang batanya’ ka’ ia, ja urakng koa, “Ahe nang dinyu ngango'i’ koa toh?” 16 Ja Yusup nyahuti’ urakng koa, “Aku ngago'i’ na’ aka’ku nang gi' tagah nungui' laok ayaman kami ka’ abut nian, nda ge’ kita’ nele’nya?" 17 Ja urakng koa ka’ Yusup, “Naun… nya na’ kabatnnya dah melah mpat ka’ mototn nian notok ka’ kampokng Dotan, jukut aku dah nangar kabatnnya ngomong lekoa.” Nangar mpa koa Yusup da’ ganceh ngampusi’ na’ aka’nya ka’ abut nang diurakng koa matakatn. Na’ aka’nya tamu dinya ka’ kampokng Dotan.

18 Taka’ Yusup gi’ jauh, na’ aka’nya dah nele’ ka’ ia. Sanape’ ia namus, na’ aka’nya dah bapakat munuha’nya 19 Ja na’ aka’nya ka’ sabayaatnnya, “Koa naunnya tukang alap buah malam diri’ dah namus! 20 Inje’ nang diri’ munuhnya, bangkenya didiri’ tabakatn ka’ kolam nang dah karikng, batak ja’ kade’ ia dah dilaok udas ngarantak, tele’ nang nae buah malamnya koa jajia’ ge’ ina?" 21 Nangar na’ kamar kapalanya dah ngarengka munuha’ Yusup, Ruben basatiar ngalapasatna’nya biar ia ina’ dikamar kapalanya bunuh. Ja katanya, “Ame ja’ ia didiri’ bunuh!” 22 Ja Ruben agi’, “Ame sampe diri’ ngalelehatn darah boh, edo’ dehe’ ia didiri’ tama’an ka’ kolam nang nda ka’ mototn paser nian, ame didiri’ kahe-kaheatn ia." Ruben bakata lekoa jukut ia gi’ basatiar nuluknga’ Yusup mabaa’nya pulakng ka’ rumah. 23 Lekoa Yusup namus, ia da’ dina’ aka’nya mata’apatn, pahiak jubahnya nang miah edo’ nang dinya ngiak, dina’ aka’nya musi’. 24 Laka’ koa ia dina’ aka’nya majujutatn, baru' dina' aka'nya nabakatn ka’ dalapm kolam karikng nang dah ina’ barai’.

25 Baru’ ja’ badudukatn mao' bamakanana’, na’ aka’nya tatele’ ka’ na’ urakng Ismael nang badagakng mpat ka’ binua Gileat. Kabatnnya ka’ koa naiki’ onta ngincakngi’ maringa dagakngnya: damar, balsam man paringa rampah. Kabatnnya nyuala’ maringa jukut koa ka’ nagari Maser. 26 Nele’ mpa koa Yahuda bakata ka’ na’ kamar kapalanya, “Ke’ Yusup didiri’ bunuh, didiri’ sosokatn darah calahnya, ahe ba untukngnya ka’ diri’? 27 Edo’ dehe’ didiri’ jual ja’ ia ka’ urakng Ismael naun, ame ia didiri’ pajara, agi’ uga ia koa kamar kapala diri’." Kata Yahuda koa da’ dikamar kapalanya asiatn. 28 Taka’ sodagar-sodagar binua Midean ngalintas ka’ abut koa, Yusup da’ dina’ aka’nya na’ap mpat ka’ dadal kolam, ia dina’ aka’nya nyual ka’ urakng Ismael raganya duapuluh ete’ duit perak. Laka' koa ia diurakng Ismael maba ka’ nagari Maser. 29 Taka' Ruben nyubuki’ Yusup ka’ kolam pinahanya kana tama’an, dinya nele’ Yusup dah nana’ agi’ ka' koa, tagal koa ia da’ ngarantak pahiaknya jukut atinya miah kasal. 30 Ia da’ ngampusi’ na’ kamar kapalanya, ja katanya, “Kamuda’ koa dah nana’ ka’ dalapm kolam. Ngahea’ unang aku ampeatn?” 31Laka' koa na’ aka’nya da’ ngalelet kambing, baru' jubah Yusup nang miah edo’ koa dikamar kapalanya nyalupatn ka' darah kambing koa. 32 Jubah nang miah edo’ koa dina’ aka’nya suruh incakng ka' na’ pa’nya sirage bapasatn, “Jubah nian dah dikami namuan ka’ moton paser, dikita’ tele’ ja’ doho’. Nu’ Yusup ge’ ahe?” 33 Yakop da’ maringasatni’ jubah koa. Ja katanya, “Nian ngka’ jubah Yusup, ia sa’nya dah dilaok udas ngarantak!” 34 Yakop da’ ngarantak pahiaknya, ia da' bapaca' guni tagal atinya miah banasal mikiri' naknya, baari-ariatn ia marundo nganang naknya koa. 35 Sigana naknya nang laki man nang bini basatiar mujuk pa’nya. Ja katanya ka’ na’ naknya, “Atiku ina’ taibura’ dikita’, jukut parasaku nian nta miah marundo, rasa matia’ uga’ ngampusia’ Yusup ka’ subayatn.” Lekoa ba Yakop nganang naknya koa. 36 Au’ ahe ba, Yusup dah diurakng Midian nyual ka’ Potipar urakng Maser. Ia koa pagalar-pajanang istana Pira'un, nang jaji pangalima bala istana.

39

Yusup ka’ Rumah Potipar

1 Yusup nang dah diurakng Ismael mali, dikabatnnya ngincakng ka’ nagari Maser, ka' koa ia dikabatnnya nyual ka’ Potipar. Potipar koa pagalar-pajanang nang jaji kapala’ pangawal Pira'un. 2 Ia diapm man Potipar ka’ rumahnya. Yusup di-Jubata ngingu, tagal koa ahe ja’ nang dinya ngarajaatn ngatangan tuah-untukng. 3 Nau'an kade' Yusup di-JUBATA ngingu man di-Nya mare’ tuah-untukng ka’ sigana pakarajaatnya, 4 Potipar jaji repo ka’ ia, tagal koa Yusup dinya morongan jaji ulutn nang dinya mucayai'. Ia dinya nyuruh ngurus rumahnya, sigana jukut nang dinya ngampu’ dinya  mucaya'atn ka’ Yusup. 5 Mulai’ ja' Yusup dinya mucayaatn ngurusi' sigana jukut nang nda ka' rumahnya, lekoa uga’ kabon man umanya, mulai' koa urakng Maser koa di-JUBATA mare' tuah-untukng.  6 Potipar mucayaatni’ sigana jukut nang dinya ngampui’ ka’ Yusup, ia ina’ agi’ ngurusi’ ahe-ahe, pamakatnnya ja’ nang gi’ dinya natapatn babaro.

Yusup koa urakng nang babasa nang sidi edo' tabeatnya, ia koa uga' bujakng tarigas. 7 Tah sangahe lama laka' koa bini Potipar amalatn ka’ ia, Yusup dinya maba babaya’ man ia. 8 Tagalnya bai’, Yusup da’ bakata ka’ ia, “Dangar ba doho’ kataku nian, sigana jukut nang dilaki kita' ngampu’i’ ina’ agi' dinya pikiri’, ahe jaku. 9 Ka' rumah nian sigana jukut dah dinya mucayaatn ka' aku. Ia koa ba kurang-labih lea aku uga’, kita’ ja’ nang ina’ dinya nyuruh ampu’i’ ka’ aku tagal kita' bininya, lemae uga’ aku taka babayaa’ man kita’, jukut ke’ diri’ babaya’ ratinya diri’ ina’ baradat, basangar-salah ka’ Jubata.” 10 Miakng ari jurut koa, bini Potipar ina’ pane jara’ maba Yusup babaya’, Yusup ja' nang bai’ batiduri' man bini Potipar koa. 11 Ari koa taka’ Yusup tama’ ka' rumah ngamasia’nya, seko’ ba nana’ urakng ka’ koa, 12 bini Potipar da’ nyingi'i’ Yusup ka’ pahiaknya, baru’ ja katanya, “Inje’ nang diri’ batiduri’!” Nele’ bini Potipar mpa koa, Yusup da’ dari ka’ luas ningalatan pahiaknya ka’ kokot nangbini koa. 13 Nele’ Yusup dari ka’ luas ningalatn pahiaknya, 14 bini Potipar da’ nyaru’i’ sigana urakng nang nda ka’ rumah koa. Ja katanya, “Dikita’ tele’ boh, Yusup urakng Ibarani nang dah dilakiku ngincakng ka' rumah nian, dah maleceh diri’. Ia dah nama’i’ aku ka’ bilikku niduria’ aku, tagalku bai’, aku da’ ngampak. 15 Taka’nya nangar aku ngapak, ia da’ dari ka’ luas, ningalatn pahiaknya.” 16 Pahiak Yusup koa dibini Potipar nohatni’ nganti'atn lakinyapulakng. 17 Taka’ lakinya dah namus ka’ rumah, ia da’ bagesah ka’ lakinya. Ja katanya, “Ulutnnyu urakng Ibarani nang dinyu ngincakng ka’ dian koa dah nama’i' aku. 18 Nele’nya mpa koa aku da’ ngampak, tagal koa ia da’ dari ka’ luas, pahiaknya dinya ningalatn dari ka' aku.” 19 Baru’ ja’ laka’ nangar gesah bininya kade' Yusup dah magila ia, Potipar jaji miah bera. 20 Tagal koa Yusup dinya nyuruh na’ap, Yusup da’ dinya nama'an ka’ tutupatn, pinaha sigana urakng nang di-Pira'un namakng. Lekoa ba gesah Yusup kana tamakng ka' tutupatn.

21 Ka’ tutupatn koa Yusup di-JUBATA ngingu, tagal koa kapala’ tutupatn koa sidi labu ka’ Yusup. 22 Sigana pakarajaatnya ngawasi’ urakng nang ka’ dalapm tutupatn dinya nyarahatn ka’ Yusup. Ia ina’ karaja ahe-ahe agi’, Yusup ja’ nang ngarajaatnya. 23 Ia ina’ agi’ nyampuri’ sigana pakarajaatn nang dah dinya nyarahatni' ka’ Yusup, sigana jukut nang di-Yusup ngarajaatn koa barasel, jukut ia di-JUBATA ngingu.

40

Buah Malam Pajajakng cocokatn man Pajajakng Pamakatn Pira'un

1 Tah sangahe lama laka’ koa, pajajakng cocokatn man pajajakng pamakatn Pira’un mamuat salah ka’ ia. 2 Tagal koa Pira'un miah bera ka’ kabatnnya koa. 3 Nyadua di-Pira'un nyuruh namakng ka' tutupatn nang ka’ rumah kapala’ pangawal istana, pinaha Yusup kana tamakng. 4 Kabatnnya  koa dikapala’  pangawal  istana  namakng  sote’  tutupatn man Yusup, biar Yusup nang nipara nyadua. Lekoa ba gesahnya ia ka' koa kana tamakng.

5 Nda ari samalam, taka’ tidur nyadua singkajah ngalap buah malam, seko’ man nang seko’ singkajah nda ratinya. 6 Alapm arinya taka’ Yusup notok nyadua, dinya nele’ ayukngnya ka' koa miah marundo. 7 Ja katanya ka’ ayukngnya koa, “Jiahe ge’ kita’ katele’atn marundo sidi?" 8 Ja nyadua nyahuti’ Yusup, “Tumalam kami singkajah ngalap buah malam, kami gi’ nape’ nau’an ahe ratinya!” Ja Yusup nyahuti’ nyadua, “Na’ ge’ Jubata ihan nang nau’an ahe ratinya buah malam kita’? Dikita’ gesahatn ja’ ka’ aku.” 9 Ja pajajakng cocokatn koa bagesah ka' Yusup, “Ka’ buah malamku koa, diku nele’ nda puhutn anggur ka’ adapatnku. 10 Puhutn anggur koa campangnya talu ete’, baru’ ga’ tumuha’ lagonya, sigana bunga anggur koa da' macah, laka’ koa’ sigana buahnya da’ bamasakatn, lanso’-lanso’ tandannya. 11 Taka' koa aku gi’ tagah nyingi'i’ cawan panuhakng cocokatn Pira'un, buah anggur koa diku marahatn ka’ cawan. Laka’ koa aku da’ ngantatnya ka’ adapatn Pira'un." 12 Ja kata Yusup ka’ ia, “Lenian boh rati buah malamnyu koa, talu campang koa ratinya talu ari, 13 kao di-Pira'un lapasatna’ man dinya amponia' talu ari agi’. Pakarajaatnnyu nang de’e dinya pulangana’, kao dinya porongana’ agi' jaji pajajakngnya, lea nang dah dinyu ngarajaatn de’e. 14 Ke’ kao dah lekoa, ame boh lupa ka’ aku kade’ idupnyu dah nyaman. Aku dinyu tulukng uga', batakatn ka’ Pira'un gesah idupku nang sasidinya, biar aku dinya lapasatn mpat ka' tutupatn nian. 15 Jukut aku nian de’e ntang kana ta’ap mpat ka’ nagari urakng Ibarani. Uga’nya aku kana tamakng ka’ dian buke' tagal aku muat tabeat nang jahat." 16 Laka' pajajakng pamakatn nangar kade' rati buah malam pajajakng cocokatn koa sidi edo’, ia da’ ngesahatn uga’ buah malamnya. Ja gesahnya ka’ Yusup, “Aku ngalap buah malam uga’, diku nele' diri’ku nyujukng panjarang pamakanan talu ete’. 17 Panjarang nang ka’ oncoknya sidi barinsi’ pamakanan nang dipajajakng manjawat yak Pira'un makatna’, pamakanan koa da’ diburung matoki’." 18 Ja Yusup nyahuti’nya, “Lenian boh rati buah malamnyu koa; talu panjarang koa ratinya talu ari, 19 kao di-Pira'un gantuknga’ ka’ tihakng talu ari agi’, bangkenyu diburukng patokia’." 20 Ahe ba, taka' Pira'un ngaramian arinya dimaranakatn, pagalar-pajanangnya dinya ngalapi’, lekoa uga’ pajajakng cocokatn man pajajakng pamakatn nang gi’ ka’ dalapm tutupatn dinya ngalap uga’. Gawe Pira'un koa dinya ngaramian, kana' talu ari laka' nyadua koa ngesahatn buah malamnya. 21 Kapala’ pajajakng cocokatn dinya mulangan agi’ ka’ pakarajaatnnya nang de’e. 22 Laka' koa kapala’ pajajakng pamakanan dinya ngantukng ka’ tihakng, kana’ lea nang dah di-Yusup matakatn. 23 Au' ahe ba, pajajakng cocokatn Pira'un koa ngka' ina' takupa agi’ ka' Yusup, Ia sidi lupa ka’ Yusup.

41

Pira'un Ngalap Buah Malam

1 Dua tahutn laka’ koa Pira'un ngalap buah malam uga’. Dinya nele’ diri’nya tagah badiri ka’ tabikng ai’ aya' Nil. 2 Ka’ buah malamnya koa dinya nele’ tujuh eko’ sapi nang nyaba' mano' man edo’ cura’nya, bakaluasatn mpat ka’ dalapm ai’ aya' Nil. Sapi ka’ koa gi' tagah majuh rumput ka’ tabikng ai’ koa. 3 Katele’atn uga’ tujuh eko’ sapi nang kurus kurengkekng da’ bakaluasatn mpat ka’ ai’ aya' Nil koa. Sapi ka' koa da’ mangka' cagir badiri ka’ samak sigana sapi nang mano' man edo' cura'nya koa. 4 Sigana sapi nang kurus kurengkekng da’ nuhapi' sapi mano’ nang tujuh eko' koa. Laka’ koa Pira'un da' nyida. 5 Lapas koa ia da' tatidur, baru' ngalap buah malam agi’. Ka’ buah malamnya koa dinya nele’ nda gandum satangke nang babege’ tujuh, bege'nya sidi calikng, gandum koa nta dah miah masak. 6 Laka’ koa da’ katele’atn agi' satangke gandum nang layu', tujuh bege’nya tampe kalape’ man karikng tagal dinyaru nang atakng mpat ka' marikng mata’ari tarabit. 7 Bege’ gandum nang tampe kalape’ koa ntang nuhap tangke’ gandum nang babege’ calikng. Laka’ koa Pira'un da’ tadohani, ia nau’an kade’ diri’nya namu buah malam. 8 Alapm arinya ati Pira'un jaji gulensah, tagal koa sigana pamane man sigana urakng nang bailamu ka’ nagari Maser dinya nyuruh ngadap ka' ia. Ka’ na’ kabatnnya ka’ koa Pira'un da’ ngesahatn buah malamnya. Seko’ ba ina’ urakng ka’ koa nang nau’an ahe rati buah malamnya. 9 Nangar mpakoa  pajajakng cocokatn da’ bakata ka’ Pira'un, “Ari nian aku takupa ka’ kasalahatnku de’e. 10 Taka’ sigana pagalar-pajanang dikita’ meraatn, aku man pajajakng pamakatn dikita’ namakng ka’ tutupatn nang ka’ rumah pangalima bala istana. 11 Nda ari samalam kami dua singkajah ngalap buah malam, nang singkajah nda ratinya. 12 Sarayungan man kami, nda uga’ kamuda’ bujakng urakng Ibarani nang kana tamakng. Ia koa ulutn pangalima bala istana. Kami singkajah ngesahatni’ buah malam kami ka’ ia, ia da’ pane narangkatn rati buah malam kami koa. 13 Lea nang dah dinya matakatn ka' kami, rati buah malam koa sidi da’ jaji ihan. Aku da’ dikita' mulangan ka’ pakarajaatnku agi’, pajajakng pamakanan mati dikita’ ngantukng.” 14 Nangar gesah koa Pira'un da’ nyuruh mulakngi’ Yusup ka’pinahanya kana tamakng. Yusup da’ dingalapasatn mpat ka’ tutupatn, ia da’ batatak bu'uk, baru’ bapahiak edo’, laka’ koa ia da’ ampus ngadap Pira'un.

15 Pira'un bagesah ka’ Yusup, “Janya boh, aku nda ngalap buah malam, seko’ ba ina’ urakng Maser nang nau’an rati buah malamku koa. Diku nangar kao pane narangkatn rati buah malam, asa kao nda nangar gesahnya." 16 Ja Yusup nyahuti’ Pira'un, “Tabe' ka’ kita’ Pira'un kami, buke’ aku nang pane narangkatn rati buah malam. Jubata uga' nang dah mare’ tuah-untukng raya ka’ kita’.” 17 Ja kata Pira'un ka’ Yusup, “Ka’ buah malamku koa, aku sa’nya tagah badiri ka’ tabikng ai’ aya' Nil; 18 Diku nele’ sapi tujuh eko’ nang nyaba' mano’ man edo cura’nya bakaluasatn mpat ka’ dalapm ai’, gi' tagah majuh rumput ka’ tabikng ai’ aya' Nil. 19 Uga’ diku nele’ agi' sapi tujuh eko’ nang kurus kurengkekng bakaluasani’  mpat ka’ ai’ aya' Nil koa, cura’nya nta miah jahat, sidi ina’ suah ku nele’ sapi nang jahat cura’nya ka’ sakulilikng nagari Maser. 20 Sapi nang kurus kurengkekng ka' koa da’ nuhap sigana sapi nang mano’ man edo’ cura’nya. 21 Sapi nang mano’ man edo’ cura’nya ka' koa, tama’ ka’ parut sigana sapi nang kurus kurengkekng, ntah ngahe sigana sapi nang kurus koa gi’ kurus kurengkekng uga'. Laka’ koa aku da’ nyida. 22 Taka’ku tidur agi', aku da' nglalap buah malam, diku nele’ nda gandum satangke nang lanso' babege’ tujuh, bege’nya koa calikng-calikng. 23 Baru’ diku nele’ uga’ gandum tujuh bege' nang kalape' na’ barinsi’, kana siup dinyaru nang angat mpat ka' marikng mata’ari tarabit. 24 Bege’ gandum nang kalape’ koa, ntang da’ nuhap bege’ gandum nang calikng. Buah malamku nian dah diku ngesahan ka’ sigana pamane man urakng nang bailamu, seko’ ba ina’ nang nau’an ahe rati buah malamku koa." 25 Nangar gesah Pira'un koa, Yusup da’ bakata ka’ Pira'un, ja nya, “Rati buah malam kita’ nang duete’ koa sama. Ka’ buah malam kita’ koa, Jubata dah matakatn ka’ kita’ ahe nang di-Nya panjawata’. 26 Sapi tujuh eko’ nang nyaba' mano' ratinya tujuh tahutn, lekoa uga' gandum tujuh bege’ nang calikng bunat, ratinya tujuh tahutn uga'. Buah malam nang duete’ koa ratinya sama. 27 Sapi tujuh eko’ nang kurus kurengkekng nang da’ kaluas jurut koa, ratinya tujuh tahutn. Lekoa uga' gandum tujuh bege’ nang kalape’ man layu' tagal dinyaru nang atakng marikng mata’ari tarabit, ratinya tujuh tahutn pansa pangalaparatn. 28 Lea nang dah diku matakatn ka’ kita’, kade’ Jubata dah nele'atni' ahe nang di-Nya panjawata’. 29 Lenian boh, tujuh tahutn bajurut, miakng eko’ urakng ka’ sakulilikng nagari Maser idupa’ nyaman. 30 Laka’ ari nang tujuh tahutn koa, baru’ tujuh tahutn bajurut sigana urakng bakalaparatni’. Urakng da’ lupa pansa idup nyaman nang tujuh tahutn de’e. Nagari nian jaji kakaringan tagal dipansa pangalaparatn nang majaraatni' talino. 31 Nana’ katele’atn agi’ lalanya kade’ nagari nian de’e idup nyaman, tagal dikaparatn koa, jukut sigana urakng sidi miah jara. 32 Kita’ namu buah malam koa dua kali, ratinya ahe nang dah di-Jubata  tantuatn ina’ lama agi’ da’ di-Nya pajajia’. 33 Tagal koa, edo’ dehe’ dikita’ gago'i’ pamane nang rancakng bapikir, da’ dikita’ angkat yak ngapalai’ nagari Maser. 34 Edo’ uga’ dikita’ angkati’ pangaramisi nang karajanya na'ap tasih anyian gandum ka’ sigana urakng Maser, taka’ kabatnnya gi’ banamuan gandum ari tujuh tahutn nang bajurut koa. 35 Taka’ banamuani’ gandum tujuh tahutn koa, sigana urakng dikita’ karah ngomo'ani’ pamakanan, uga’ dikita’ parentahatn ka’ sigana urakng nang nda ka' miakng kampokng, dikita’ panjawati dango yak nohatni' gandum. 36 Gandum nang didiri’ komo'ana' yak ngadapia’ pansa pangalaparatn nang tujuh tahutn koa, yak jaji bahata urakng diri’ nang ka’ sakulilikng nagari Maser, ame sampe bamatiatni' tagal dipansa pangalaparatn koa.”

Yusup jaji Pagalar-pajanang

37 Pira'un man pagalar-pajanangnya mao’ ngasi’ ka’ ahe nang di-Yusup matakatn koa. 38 Pira'un da’ bakata ka’ na' pagalar-pajanangnya, “Sidi baruntukng diri’ namu urakng lea Yusup nian, talino nang raya man pama Jubata.” 39 Ja Pira'un ka’ Yusup, “Jubata dah mare’ kao sigana ilamu man pamane nang manjawat kao rancakng bapikir, mae ba nda agi’ urakng nang pane lea kao. 40 Tagal koa, kana’ sidi kade' kao nang jaji kapala' pagalar-pajanang ka’ istanaku nian, sigana urakng Maser ngasiatna’ parentahnyu, aku ja’ nang ngatasi’ kao. 41 Ampeatn kao diku angkat jaji urakng nang bapangkat tingi ka’ nagari Maser." 42 Laka’ koa Pira'un da’ ngalapasatn cincitnnya nang bamatarai mpat ka’ kokotnya, cincitn koa da’ dinya nakatatn ka’ kokot Yusup. Yusup dinya mahiaki’ uga' man pahiak nang miah edo’, tage’nya dinya ngongkokngi' man kongkongan amas. 43 Yusup dinya nyuruh naikatn ka’ karetanya nang sote’, sigana urakng da’ nyimpado man nyuraki’ Yusup, ja kabatnnya, “Arus-arus…arus!” Lekoa ba gesahnya ari Pira'un ngangkat Yusup jaji urakng nang bakuasa ka’ nagari Maser. 44 Ja Pira'un agi’, “Aku nian Pira'un ka’ nagari Maser, ari nian aku bapadah ka’ kita’, ahe ma’an nang di-Yusup parentahatn ka’ kita’ ame boh ina’ dikita’ asi'atn.” 45 Yusup di-Pira'un nalah Sapnat-Paneah, uga’ dinya mangantenan man Asnat nak Potipera nang jaji panyangahatn ka’ kampokng On. Lekoa ba pamula'annya Yusup bakuasa ka’ nagari Maser. 46 Taka’nya ngadap Pira'un, Yusup baomor talu puluh tahutn, laka’ koa Yusup da’ batulak ningalatn Istana, ampus ngulilikngi’ sigana abut nang nda ka’ nagari Maser. 47 Tanah nang yak dikabatnnya bahuma tujuh tahutn bajurut nta banamuani' gandum sintuak baloa’. 48 Sigana paringa pamakanan ka’ miakng kota di-Yusup ngomo’ani’, taka’ pansa bahanyi nang tujuh tahutn bajurut koa. Anyian koa dinya nohatni’ ka’ sigana dango ka’ miakng kota sakulilikng nagari Maser. 49 Yusup ngomo'ani’ gandum nang miah badakah ina’ tabilakng agi’, lea karasik ka’ sisi ai’ laut, tagal koa urakng bai’ agi’ ngetongnya jukut dah sidi na’ tabilakng.

50 Sanape’ pansa pangalaparatn koa, Asnat nak Potipera panyangahatn nang ka’ kampokng On, bini Yusup koa maranakatni’ naknya nang dueko', nyadua koa kamuda' laki. 51 Naknya nang tuha di-Yusup nalah Manase, jukut ja katanya, “Aku dah di-Jubata nyajiatn ina’ takupa agi’ ka’ sigana kajaraatnku man ka’ rumah na’ pa’ku.” 52 Naknya nang nomor dua dinya nalah Eparaim, jukut ja katanya, “Aku dah di-Jubata nuahi’ kamuda', ka’ nagari pinaha aku idup jara.” 53 Lapas ari tujuh tahutn pansa urakng Maser namu gandum nang miah badakah, 54 baru’ da' bamula pansa pangalaparatn ka' sigana nagari, kana’ lea nang dah di-Yusup matakatn de’e. Ka’ sigana nagari Maser ihan nang nda bapamakanan. 55 Taka’ sigana urakng nang nda ka’ nagari Maser bajaraatn tagal dikaparatn, kabatnnya ngampusi’ Pira'un, bapinta’ pamakanan ka’ ia. Pira'un bakata ka’ sigana urakng Maser koa, “Dikita’ ampusi’ ja’ Yusup, ahe nang dinya batakatn, dikita’ asi’atn ma'an.” 56 Pansa pangalaparatn sia’ miah kuat ka’ sigana ai'-tanah, sigana dango gandum di-Yusup muka'i’, gandum koa dinya nyuali’ ka’ urakng Maser. Jukut pansa pangalaparatn koa nta sia’ miah kuat ka’ sigana nagari Maser. 57 Buke’nya urakng Maser ja' nang bamaliatni’ gandum, urakng nang ntah mpat ka’ mae nang ana' baatangani' uga', mali pamakanan ka’ nagari Maser.

42

Kamar Kapala Yusup Ampus ka' Nagari Maser

1 Taka’ di-Yakop nangar kade’ ka’ nagari Maser nda urakng nyuali’ gandum, ia bakata ka’ na’ naknya, ”Ngahe ba kita’ ina’ da’ bakucacik?” 2 Ja katanya agi’, “Diku nangar ka’ nagari Maser nda urakng nang nyuali' gandum, da’ gancehi’ ampus ka’ naun, babali gandum yak diri’ makatna' samianakatn, biar diri’ ame mati balor.” 3 Laka’ koa na' kamar kapala Yusup urakng sapuluh batulak notok nagari Maser malia’ gandum. 4 Benyamin adi’ Yusup ja’ nang di-Yakop mai’an ampus man na’ aka’nya, tagalnya gali’ naknya koa kana bano, ahe-ahe antah ka’ maraga." 5 Panganak Israel ka’ koa ampus barage man na’ urakng nang mpat ka’ sigana nagari, nang singkajah bamaliatna' gandum ka' nagari Maser. Jukut ka’ binua Kana'an tagah pansa pangalaparatn uga'. 6 Taka’ koa Yusup dah jaji mangku ka’ nagari Maser. Ia nang nyuali’ gandum ka’ sigana urakng, tagal koa na’ kamar kapalanya ampus ngadap man sorok-sambah ka’ ia. 7 Taka’ nele’ na’ kamar kapalanya, Yusup da’ ngilala ka’ na’ aka’nya. Ia se’-se’ ina’ nau’an ka’ na’ aka’nya, tagal koa kamar kapalanya da’ di-Yusup ngaok, “Heh, mpat ka’ mae kita’ nian!” Ja na’ aka’nya nyahuti’nya, “Kami nian mpat ka’ binua Kana'an , malia’ pamakanan ka’ nagari kita’.” 8 Yusup ja' nang ngilala ka’ na' kamar kapalanya, ia ka' koa sidi ina’ nau’an agi' ka’ ia. 9 Ia jaji takupa agi’ ka’ buah malamnya are’. Ja katanya ka’ kabatnnya, “Buke’ ge’ kita’ nian atakng ngintea', nele’ia’ gunar mae nagari nian nang ina’ babala?” 10 Ja na’ aka’nya nyahuti’nya, “Nta buke’ boh kami nian panginte, kami nian ulutn kita’ atakng ka' keatn ngka’ sidi malia’ pamakanan. 11 Kami nian gi’ adi’-baradi’ nang bakamar kapala seko’ apa’. Ina’ ba kami ngaloki’ kita’, kami sidi buke’ panginte.” 12 Ja Yusup ka’ na’ aka’nya , “Alok! Kita’ koa ngka’ panginte nang nele’ ia’ arapm mae abut nang ina’ babala binua.” 13 Ja kata na’ aka’nya nyahuti’ Yusup, “Ngka’ sidi ba, kami nian gi’ adi’-baradi’ urakng dua balas, nang bunsu ja’ nang ina’ ampus, jukut ia badiapm man na’ pa’nya ka’ binua Kana'an , nang seko’ agi’ dah nana’.” 14 Ja Yusup ka’ kabatnnya, “Dah kita’ ame manyak omong! Kita’ nian ngka’ panginte!" Ja kata Yusup agi’ ka’ kabatnnya, 15 “Lenian ja’, kita’ diku tarai doho’, ke’ kita’ ngka’ buke’ gi’ tagah nginte nagari nian, ame kita' pulakng doho' sanape' adi’ kita’ nang bunsu dikita’ baba ka’ keatn. Nian aku babatak ka' kita’ sidi-sidi, mpa ja parentah Pira'un. 16 Seko’ ja’ nang dikita’ suruh pulakng doho’ mulakngi’ adi’ kita' koa. Nang lain diku tamakng doho' ka' keatn, jukut aku mao’ nau’ana’, sidi ge’ ahe nang dikita’ ngesahatn koa, ke’ nana’ sidi ratinya sama uga' kita’ ngaloki’ Pira'un, kita’ nian ngka’ panginte.” 17 Kamar kapalanya ka' koa di-Yusup namakng ka’ tutupatn talu ari malaman. 18 Kana’ talu ari na' kamar kapalanya ka’ tutupatn, Yusup bakata ka’ kabatnnya, “Aku nian urakng nang saukng ka’ Jubata. Janya ja' boh, kade' kita’ mao’ idupa’, dikita' asi'atn ahe nang diku matakatn nian. 19 Ke' kita’ ngka' urakng bujur, dikita asi'atn parentahku nian, sigana kita' baya bapulangan ngantati’ gandum yak sarumahan kita’ bamakanan. Urakng seko’ ja’ nang badiapm ka’ tutupatn. 20 Baru’ dikita’ baba adi’ kita’ nang bunsu ka’ keatn, ngkoa tandahannya kade’ gesah nang dikita’ matakatn koa ngka’ sidi, biar kita’ ina’ kana ukum mati.” Na’ aka’nya da’ sapakat ngasi'atn kamao’an Yusup. 21 Kabatnnya bakata ka’ sabayaatnnya, “Nian jajinya idup diri', tagal disangar-salah ka’ adi’ diri’ are’. De'e ia sidi’ kasasakatn minta lapasatn ka’ diri’. Diri' ja' nang tarajuh, bai' nangaratn ia, tagal koa mpeatn diri’ uga’ miah kasasakatn.” 22 Ja Ruben nyahuti’ na' kamar kapalanya, “Dah diku matakatn ihannya ka’ kita’ de’e, ame dikita’ kahe-kaheatn kamuda’ koa, kita’ ja’ nang ina’ ngasi’atn kataku. Ampeatn nyawanya dah nuntut ka’ diri’.” 23 Na' aka’nya ina’ nau’an kade’ Yusup ngarati ka’ kata kabatnnya, jukut na’ aka’nya make panyintang-ngomong nang nulukngi ia ka' koa bakata ka' Yusup. Yusup ja' nang se’-se’ nana’ ngarati, 24 Laka’ koa na’ aka’nya di-Yusup ningalatn, baru’ ia da' ngeak tagal nangar omongan na’ aka’nya. Ina’ lama laka' koa ia mulakng agi’, Simeon da' dinya na’ap, baru’ dinya nyuruh tengo’ ka’ adapatn kamar kapalanya. 25 Laka’ koa ulutnnya di-Yusup marentahatn nyumpitni' gandum ka' palupuk na’ aka’nya. Sigana bahata yak kabatnnya bamakanana’ ka’ maraga dinya mare'atn, uga' duit na’ aka’nya dinya mulangani’ agi’. Lekoa ba nang diurakng koa mamuat ka' na' kamar kapalanya. 26 Kabatnnya da’ batulak laka’ ngomosi’ palupuk ka’ balikang kaladae. 27 Kabatnnya bamalam ka’ maraga, ka’ pinahanya bamalam nda nang muka’ palupuknya, yak mare’ia’ kaladae ka’ koa pajuh, dinya nele’ nda duit ka’ palupuknya. 28 Ja katanya ka’ kamar kapalanya, “Tele’ ga’ duitku kana pulangan agi’ ka’ palupukku!” Nele' mpakoa ati na' kabatnnya sidi miah kasusahatn, singkajah batele’-tele’, kabatnnya ka’ koa bagangataratn. Ja kabatnnya ka' sabayaatnya, “Ahe uga’ nang di-Jubata atangana’ ka’ diri'?” 29 Taka’ na’ kabatnnya koa dah namus ka’ binua Kana'an, batamu man pa’nya, ia ka' koa ngesahatni’ sigana ahe nang dah kabatnnya namu. 30 Ja kata kabatnnya, “Urakng nang jaji mangku ka’ nagari Maser koa dah meraatn kami. Kami dinya ngaraga lea munsuh nang gi’ tagah nginte nagarinya. 31 Nangar mpa koa, kami nyahuti’nya, buke’ kami panginte, kami nian urakng bujur, 32 samadi'atn kami seko’ apa’, urakng dua balas. Nang seko’ dah nana’, nang bunsu nda ka’ na’ pa’nya ka’ binua Kana'an . 33 Mangku koa nyahuti’ kami; sidi ge’ ina’ nang dikita’ matakatn koa, ke’ ngka' lekoa dikita’ pasar ka’ keatn doho adi’ kita’ nang seko’. Gandum koa baya dikita’ incakngi’, biar sarumahan kita’ ina’ babaloratn. 34 Adi’ kita’ nang bunsu koa dikita’ baba uga’, kade' kita’ mulakng agi’ ka’ keatn, tandahatn kita’ ngka’ buke’ panginte, ina’ ngaloki’ aku; baru’ kamar kapala kita’ diku lapasatn. Laka’ koa kita’ baya nyarohi’ sigana nagari nian ka' mae ma'an kita' mao’.”

35 Laka’ koa kabatnnya da’ mungkari’ sigana palupuknya,  dikabatnnya nele’ ka’ palupuknya singkajah nda sasalepe’ duit, tagal koa na’ kabatnnya man na’ pa’nya sidi kagali’anan. 36 Ja kata Yakop ka’ na’ naknya, “Sidi tarajuh ba kita’ nian toha, kita' dah ngalangitatni’ nakku. Yusup dah nana’, Simeon dah nana’ uga’, ampeatn Benyamin dikita’ babaa’ uga’. Aku nang miah marundo tagal disigana kasusahatn nian.” 37 Ja Ruben ka’ pa’nya, "Janya ja’, dikita’ pucaya’atn Benyamin ka’ aku, ia tatap kubaba pulakng agi’, ke’ ina’ ku baba pulakng, nakku nang dueko’ koa ja’ yak jaji gantinya, baya dikita’ bunuh.” 38 Ja Yakop nyahuti’nya, “Bai' ku dah ngasiatna’ kita’, tatap ja’ ia dikubai’atna’ ampus man kita’, jukut aka’nya Yusup dah nana’, ia ihan nang gi’ nda, ke’ ahe-ahe antah ka’ maraga, sama uga' kita’ nyuruha’ aku ampus notok ka’ subayatn, tagal miah marundo”.

43

Benyamin Nuna'an na' Kamar Kapalanya Ampus ka' Nagari Maser

1 Pansa pangalaparatn ka’ sigana binua Kana'an sia’ miah kuat. 2 Taka’ koa, gandum nang dikabatnnya mali mpat ka’ nagari Maser dah kamaknga'. Ja kata Yakop ka’ na’ naknya, “Pamakanan diri’ dah kamaknga’, dah baya unang kita’ mali agi’ ka’ nagari Maser.” 3 Ja kata Yahuda nyahuti’ pa’nya, “Mangku nagari Maser koa dah babatak ka’ kami. Ja katanya; kita’ sidi ame boh nele’ muhaku agi’ kade’ adi’ kita’ nang bunsu koa ina’ dikita’ baba ka’ keatn. 4 Ke’ kita’ mao’ morongan Benyamin nuna’an kami, baru’ kami mao’ ampus ka’ naun, maliatni’ pamakanan diri’. 5 Ke’nya ina’ dikita’ porongan ampus man kami, nana’ me kami barania’ ampus ka’ nagari Maser, jukut urakng koa sidi dah bapasatn ka’ kami; ke’ adi’ kita’ nang bunsu ina’ dikita’ baba ampus barage man kita’ ka’ keatn, kita’ na’ mulih nele’ muhaku.” 6 Ja kata Israel nyahuti’ na’ naknya, “Kita’ nian sidi ngatangan bano ka’ aku, tagal dikita' matakatn kade' nda agi’ seko’ adi’ kita’.” 7 Ja kata na’ naknya nyahuti’nya, “Urakng koa nang nanya’ani’ kami miakng eko’, uga’ sigana page waris diri’ abis dinya nanya’an. Ja katanya; apa’ kita’ gi’ idup ge’ ahe? Nda ge’ ahe adi’ kita’ agi’? Kami uga’ dah madahatn sigana page waris diri’ ka’ ia, kami ina’ nau’an kade’ ia nyuruha' kami maba adi’ kami nang bunsu ampus ka' naun.” 8 Yahuda bakata uga’, “Janya ja’ pa’a, ke’ kita’ mao’ kami ganceha’ ampus ngago’ gandum, ame dikita’ bai’atn Benyamin, porongan ma’an ia ampus nuna’an kami ka’ naun, biar diri’ samianakatn ina’ bamatiatn tagal dikaparatn. 9 Dikita’ pucaya’atn ja’ ia ka’ aku, kade’nya ina’ diku baba pulakng agi’, aku nang dikita’ tuntut, ukumannya diku tanguknga' sintuakku mati. 10 Ke’ diri’ ina’ basingkaba'atni', kami dah baya pulakng-ampus dua kali.” 11 Ja kata Yakop ka’ na’ naknya, “Ke’ lekoa bakamas ja’ kita’, sigana asel ka’ binua diri’ nian dikita’ komo’ani’ ka’ karong gandum koa, yak mare’ toa’ urakng koa, tandahan diri’ sorok-sambah ka’ ia; dikita’ icakngi’ balsam saebet, uga’ madu, damar, maringa rampah, buah guminting man saparinga kacang. 12 Dikita’ icakngi’ uga’ duit dua kali manyaknya, duit nang dikita’ namuan ka’ dalapm palupuk kita’ de’e dikita’ pulangani’ agi’, tusa’nya ina’ kana manciatn. 13 Ina’ ahe-ahe ke’ adi’ kita' koa dikita’ baba uga’, komosatni' ja' sigana jukut nang dikita’ incaknga’, da’ baampusatn nang kita' notok urakng koa. 14 Kira’nya Jubata Pangampu’ ai’-tanah nang baparaupm ka’ uwa’-uwang, mao’ ngasihatni' kita’ man kamar kapala kita’ nang gi’ kana tamakng, uga’ Benyamin nang nuna’ana kita’ kira’nya mulakng agi’ man kita’ ka’ kampokng diri’ nian.

Aku ame dikita’ pikiri', ke’ aku sampe kalangitatn anakku, mpahea’ ba agi’!” 15 Laka’ koa, kabatnnya da’ bakamas, ngomosi' sigana sulungan nang dinya ka' koa bare’atna’, uga’ ngincakngi’ duit dua kali manyaknya. Benyamin ampus uga' man na’ aka’nya, ia ka' koa da' batulak ka’ nagari Maser. Lekoa namus, kabatnnya da’ ngadap ka’ Yusup. 16 Taka’ Yusup nele’ kade’ Benyamin ampus uga’ barage na’ aka’nya, ia bakata ka' ulutnnya nang ngapalai' dangannya, “Antati' sigana urakng nian ka’ rumahku, dikita' leletatn laok ayaman, tangah ari nian ia ka' koa bamakanana’ barage man aku.” 17 Ulutnnya da’ ngasi'atni' ahe nang di-Yusup nyuruhatn koa. Kabatnnya da’ diulutn koa maba tama’ ka’ rumah Yusup. 18 Taka’ kabatnnya nau’an kana baba tama’ ka’ rumah Yusup, ia ka' koa jaji kagali’anan. Ja kabatnnya ka' sabayaatnnya, “Diri’ dinya maba ka’ rumahnya tagal diduit nang didiri' namu ka’ palupuk diri’ de’e, tusa’nya diri’ dinya jajiatna’ ulutnnya, baru’ kaladae diri’ dinya ta’apia’.” 19 Tagal koa ulutn nang ngapalai' rumah Yusup nang gi' tagah ka’ muha talobo’ koa dikabatnnya notok, sirage batanya ka' urakng koa, 20 “Baya ge’ kami ngomong ka’ kita? De’e kami dah mali pamakanan ka’ keatn, 21 taka’ namus ka’ pinaha bamalam, kami singkajah mukai’ palupuk kami, ka’ dalapmnya dikami namuani’ duit nang yak mayar gandum de’e, duit koa ampeatn dikami ngincakng agi’. 22 Kami uga’ ngincakngi’ duit yak malia’ gandum agi’, jukut kami sidi nta ina’ nau’an sae nang dah nohatni’ duit koa ka’ palupuk kami.” 23 Ja kata ulutn nang ngapalai’ rumah Yusup koa, ”Kita’ ame gulensah, ame uga' kita' gali' doho’, sae tau’atn Jubata nang dikita' man na' pa' kita' nyambah, dah mare’ kita' tuah-untukng kakayaatn ka’ dalapm palupuk kita’ koa, duit koa dah nda ka’ aku.” Laka’ koa Simeon dinya maba ka’ na' kamar kapalanya. 24 Urakng koa ngayukngi' kabatnnya notok rumah Yusup. Ia uga' da’ ngincakngi ai’ yak kabatnnya nyasahi’ paha. Kaladae na' kabatnnya uga’ dinya mare’ pajuh. 25Laka’ koa na’ kabatnnya da’ ngomosatni’ paringa lantatn yak dikabatnnya sulungana' ka' Yusup, taka’nya pulakng ka’ rumah tangah ari nae’, jukut kabatnnya dah kana bataki’, kade’ ia ka' koa makatna’ barage man Yusup. 26 Taka’ Yusup atakng ka’ rumah, kamar kapalanya mare’atni’ paringa sulungan nang dina' kabatnnya ngincakng koa. Sirage mare’atnnya, ia ka' koa sorok-sambah ka’ Yusup ngogo'atni' kapalanya namus ka’ lante. 27Kabatnya ka’ koa di-Yusup nanyai’, "Baringangan ge’ ahe kita'?" Ja katanya agi’, “Mpahe apa’ kita' nang dah tuha nang dikita' ngesahatn de'e? Gi' mangkeh ge' ahe ia?” 28 Ja kabatnnya nyahuti’nya, “Apa’ kami ulutn kita’ koa gi' mangkeh.” Laka’ koa kamar kapalanya da’ nyambah Yusup. 29 Taka' Yusup ngilalai’ na' kamar kapalanya, dinya nele’ Benyamin nang sepusat man ia nda uga'. Ja katanya, “Sae ba nian, adi’ bunsu kita’ nang dah dikita’ ngesahatn ka’ aku de’e ge'?” Ja Yusup agi’, “Jubata kira’nya mare’ kao tuah-untukng toha." 30 Ati Yusup nta miah ina’ batah ka’ di’nya, tagal koa ia da’ ganceh tama’ ka’ biliknya. Ai’ matanya da’ barentengan, ia da’ ngeak tagal ngarinuatn di’nya koa. 31 Laka’nya ngeak, Yusup nyimuhai’ muhanya, baru' ia da' ngaluas agi’, pajajakng rumahnya dinya nyuruh ngidari’ pamakanan. 32 Pamakanan koa da' dinya ngidari’, miakng eko’ singkajah ngadapi’ pamakanannya. Nu’ Yusup saconcok, nu’ na’ aka’nya singkajah saconcok uga’, nu’ na' urakng Maser nang barage makatn man na’ kabatnnya saconcok uga’, jukut tungkal ka' urakng Maser kade' makatn barage man urakng Ibarani.

33 Kamar kapalanya bamakanan ka’ adapatn Yusup, duduknya di-Yusup majurutatn basusutn nuruti’ jurut tuha-muda’nya, tagal koa kabatnnya batele’-tele’ kaheranan. 34 Pamakanan nang ka’ meja Yusup koa dingidaratn ka’ na’ kabatnnya, nang dimare’atn ka’ Benyamin lima kali manyaknya. Kabatnnya sidi repo bamakanan man Yusup tangah ari koa.

44

Yusup Nyobai' na' Kamar Kapalanya

1 Laka’ koa pajajakng rumahnya di-Yusup nyuruh ngamasi’ palupuk na’ kamar kapalanya, ja katanya, ”Sigana palupuk kabatnnya, dinyu insi’ man gandum sintuak binsi’ samangkeh kabatnnya ngincakngi’nya. Duit kabatnnya dinyu tohatni’ agi’ singkajah ka’ palupuknya. 2 Cawan perakku man duit nang yaknya mayar gandum koa, dinyu tohatni’ uga’ ka’ palupuk kamuda’ bujakng, bunsu kabatnnya koa. ” Sigana nang di-Yusup nyuruhatn koa da’ diurakng koa ngaraja'atn. 3 Alapm arinya taka’ abut gi’ patakng parimpasa, kabatnnya dipajajakng koa ngantat namus ka' palasar, kabatnnya da' batulak ngincakngi’ kaladaenya. 4 Ina’ lama laka’ na’ kabatnnya kaluas mpat ka’ kota koa, taka’ gi’ ina’ sangahe jauh, Yusup bakata ka’ pajajakng rumahnya. Ja katanya, “Ampeatn kao da’ bakamas, dinyu gancehi’ nutul kabatnnya, ke’ dah batamu dinyu tanya’an ka’ na’ kabatnnya; ngahe kabaikatn dikita' malas man tabeat nang jahat?" 5-6 Taka’ batamu man na’ kabatnnya, kata Yusup koa dinya matakatn ka’ na’ kabatnnya, "Ina’ ge’ kita’ dah ngincakng cawan pinaha mangku nagari kami nyocok, cawan koa uga’ yaknya batilik. Ngahe ba kita’ dah batabeat jahat, ngaliti’ jukut mangku nagari kami?“ 7 Kabatnnya nyahuti’ ka' urakng koa, “Ngahe ba kita’ bakata lekoa ka’ kami, sidi nana’ boh kami barania’ lekoa! 8 Duit nang dikami namu ka’ dalapm palupuk taka’ pulakng ka’ binua Kana'an de’e, buke’ ge’ dah dikami mulangan agi’ ka’ kita’. Mae ge’ kami barania’ ngaliti’ sigana amas man perak nang nda ka’ rumah mangku nagari kita’ koa? 9 Lenian ja', ka’ sae jukut mangku nagari kita’ nang langit koa dikita’ tamuan, baya ia koa dikita bunuh. Lekoa uga’ kami nian sidi baya dikita' jajiatn ulutn mangku nagari kita'.” 10 Ja kata pajajakng rumah Yusup koa, “Edo’ uga’ ba ke’ lekoa, ka’ palupuk sae ja’ cawan perak koa tamu diku, ia koa nang jajia’ ulutnku, nang lain baya pulakng.” 11 Nangar mpa koa, kabatnnya da’ nurunani’ palupuknya ka’ tanah, kabatnnya da’ singkajah muka’ palupuknya. 12 Pajajakng rumah Yusup koa da’ maringasatni’ sigana palupuk kabatnnya, mulai’ mpat ka’ palupuk nang tuha, namus ka’ nang bunsu, cawan koa dinya namu ka’ palupuk nu’ Benyamin. 13 Nele’ mpa koa, kabatnnya singkajah ngarantak pahiaknya tandahatn ati kabatnnya miah kasusahatn, miakng eko’nya da’ bakamas, sigana palupuk ka’ koa dikabatnnya naikatni’ agi’ ka’ kaladae, laka' koa kabatnnya bamulangani’ agi’ ka’ kota.

14 Yusup gi’ nda ka’ rumah, taka' Yahuda man na’ kamar kapalanya namus ka’ rumahnya. Kabatnnya ka' koa da’ nyorok-nyambah ka’ Yusup, batu'ut ngogo’atni’ kapala namus ka’ lante. 15 Ja kata Yusup ka’ kabatnnya, “Adat ahe uga’ nang dikita’ ngincakng nian? Ina’ me kita’ nau’an kade’ aku nian pane nilik?” 16 Laka’ koa Yahuda da’ bakata, “Ahe ba nang kami padahatna’ agi ka’ kita’, kami nian tinggal nagaratn pamangkong kita', jukut Jubata dah mungkar kasalahatn kami ka’ kita’. Tagal koa miakng eko’ kami baya dikita jajiatna’ ulutn kita’, lekoa uga’ adi’ kami nang palupuknya barinsi’ cawan kita’ koa." 17 Ja kata Yusup ka' ia, “Ngahe ba aku ngukumia’ kita’ nang ina’ basalah! Ka’ palupuk sae cawan koa tamu, ia koa ja’ nang jajia’ ulutnku. Urakng nang na’ basalah baya pulakng agi’ ka’ kampokng urakng tuha kita’.“

Benyamin di-Yahuda Nyalinukngi’

18 Laka’ koa Yahuda da’ nyamaki’ Yusup, ja katanya, “Ame kira’nya kita’ bera, aku nian rasa ngomonga’ ka’ kita’, jukut kita’ dikami matak sama uga’ man Pira'un. 19 De’e kita’ dah batanya' ka' kami; Gi' idup ge' ahe apa’ kita'? Gi' nda ge' ahe kamar kapala kita’? 20 Dah dikami matakatn ka’ kita’, kade’ apa’ kami gi’ nda, ia dah tuha. Adi’ kami nang bunsu nang diwe’nya maranakatn taka' apa’ kami dah tuha nda man ia. Aka’nya dah nana’, adi’-baradi’nya kahe ia ihan nang gi’ idup, tagal koa pa’nya sidi bai’ jauh man ia. 21 Laka’ koa kami dikita’ nyuruh maba adi’ kami atakng ka’ keatn, jukut kita’ mao‘ nelea’nya. 22 Kami dah bakata ihannya ka’ kita’, kade’ kamuda’ koa dikami rara’ man pa’nya, pane-pane pa’nya mati. 23 Uga’nya dah dikita’ matakatn ka’ kami, ke’ kami ina’ maba adi’ kami koa, kami ina’ baya nele’ muha kita’ agi’. 24 Taka’ kami dah batamu man apa’ kami, kata kita’ koa dah dikami matakatn ka' ia. 25 Lekoa pamakanan kami dah kamakng, kami diapa’ kami nyuruh ampus mali pamakanan agi’ ka’ keatn. 26 Uga’nya dah dikami matakatn ka’ apa’ kami, kade’ Benyamin ina’ barage man kami, lemae unang kami ampusa’? Jukut urakng koa dah bapasatn, ke’ adi’ kami’ nang bunsu ina’ dikami baba keatn, kami ina’ baya nele’ muhanya agi’. 27 Ja kata pa’ku ulutn kita' koa ka' kami, kita’ dah nau’an ke’ Rahel we’ kita’, maranakatn kamuda’ kahe dueko’ ihan; 28 Nang seko’ dah ningalatn aku, jatiku ia dah dilaok udas ngarantak, jukut aku nana’ nele’nya pulakng agi’. 29 Kade' nakku nang bunsu nian dikita’ babaa’, nae ke’ ahe-ahe antah ka’ ia, pane-pane aku nang dah miah tuha nian turutn ka' subayatn tagal dibano koa. 30-31 Tagal koa ke’ kami pulakng agi' ka’ rumah na’ apa’ku, nana’ maba adi’ku koa, jukut ia nta matia’ kade’ jauh man kamuda’ koa. Kade’ adi’ku nang bunsu koa ina’ pulakng agi’ man kami, apa’ku nang dah tuha koa atinya nta sidi miaha’ marundo sintuaknya mati, notok subayatn tagalnya nganang kamuda’ koa. 32 Aku dah bakata ka’ pa’ku kade’ ahe-ahe antah ka’ Benyamin, kade' ia nana’ pulakng agi’ barage man kami, aku nang ngantinya, aku nang nangukng sigana sangar-salahnya sintuak kumati. 33 Tagal koa na’ ngahe aku ma’an ja’ nang jaji’ ulutn kita’, ngalih kamuda’ koa, biar ia baya pulakng man na’ aka’nya. 34 Jukut lemae uga’ ba aku pulaknga’ notok rumah apa’ku, kade’ kamuda’ koa ina’ pulakng ka’ kampokng man kami? Nta bai’a’ aku pulakng ka’ kampokng nele’a’ apa’ku kana bano.”

45

Yusup Matakatn Diri’nya ka’ na’ Kamar Kapalanya

1 Yusup dah na’ mangkeh agi’ nagaratn parasanya, tagal koa ia da' bakata ka’ sigana urakng nang buke’ kamar kapalanya nang babadiriatn ka’ samaknya, ja katanya, ”Da' bakaluasatn ja' kita' doho’.” Nangar mpa koa, urakng ka' koa da' bakaluasatn. Seko’ ba ina' kabatnnya ka’ bilik koa taka' Yusup matakatn diri'nya ka’ na’ kamar kapalanya. 2Laka’ koa Yusup da’ takeak, keaknya koa kana taringahan diurakng Maser, sigana urakng nang ka’ istana Pira'un nda nangarnya uga’. 3Ja Yusup ka’ na’ kamar kapalanya, “Yusup te’ aku nian! Gi’ idup ge’ ahe apa’ diri'?” Nangar mpa koa na’ kamar kapalanya bubuh ina’ barani nyahuti’ kata Yusup koa, jukut kamar kapalanya tagah basingagaratn miah kagali’anan ka’ ia. 4 Ja kata Yusup ka’ na’ kamar kapalanya koa, “Ka’ dian ba samak-samak man aku.” Kabatnnya da' nginsit nyamaki’ Yusup. Ja katanya agi’, “Aku nian Yusup kamar kapala kita’ nang dah dikita’ nyual ka’ nagari Maser de’e. 5 Ampeatn ame kita’ susah ati man banasal tagal kita’ dah nyual aku ka’ abut nian, jukut yak miharaa' diri’ ihan, aku dah di-Jubata nyuruh atakng doho’ ka’ keatn nyintolo'i' kita’. 6 Pansa pangalaparatn nian tagah gi’ bajalatn dua tahutn, ari lima tahuntn agi’ urakng ina’ bahumaa' man ina’ bahanyia'. 7 Tagal koa Jubata dah nyuruh aku nyintolo'i’ kita’, biar aku jaji urakng nang mihara man nulukngia’ sigana page waris diri’, biar lanu’ omornya, baranak-barucu raya, ringakng tubuh sigana piturutn diri’ ka’ ai’-tanah nian. 8 Jubata ihan nang dah nyajiatn aku kapala’ pamane nang mare’ pituah ka’ Pira'un,  jaji  pagalar-pajanang istananya man urakng nang bakuasa ka' nagari Maser nian. Buke’ tagal dikita’ aku namus ka’ keatn. 9 Da’ dikita’  gancehi' mulakngi’ na’ apa’, batakatn pasatnku nian ka’ ia; Jubata dah maduduk aku jaji pangampu’ sigana nagari Maser, tagal koa da’ ganceh totok aku ka’ keatn. 10 Kita’ kusuruha’ badiapm ka’ binua Gosen, samak man aku, kita’ man sigana anak-ucu’ kita’, uga' kambing-domba, karabo-sapi man sigana jukut panamu nang dikita ngampui’. 11 Ka’ abut koa nae aku miharaa’ kita' jukut pansa pangalaparatn nian gi’ lama’a’, ngalapasatn ari lima tahutn agi’. Jatiku ame kita’ jaji urakng kodo, uga' sigana urakng nang badiapm man nang nuna’an kita’, lekoa uga’ laok ayaman kita' ame sampe nana' majuh." 12 Ja Yusup agi' ka' na' kamar kapalanya, "Kita’ uga’ dah nele’ man mata kapala kita’ babaro, koa nda uga’ Benyamin nangar kade' molotku babaro nang matakatnnya. 13 Tagal koa batakatn ka’ apa’ sigana nang dah dikita’ nele’ ka’ nagari Maser, panamuku pangkat man kadudukatnku, da’ ganceh baba apa’ ka’ keatn. 14 Laka’ koa Yusup da’ ngapakng Benyamin di’nya nang seko’ uwe’ man ia koa, siragenya ngeak. Benyamin da’ ngeak uga’ ka’ bahu Yusup ngapakng tage’ aka'nya. 15 Yusup uga’ ngidungi’ na’ aka’nya, ia da’ ngeak taka’ ngapakngi’ na’ aka’nya, laka’ koa na’ aka’nya baru’ bangomongan man ia.

Page waris Yusup di-Pira'un Ngalap Badiapm ka' Nagari Maser

16 Taka’ di-Pira’un man pagalar-pajanangnya nangar kade’ na' kamar kapala Yusup atakng ka’ nagari Maser, kabatnnya uga’ repo ati nangarnya. 17 Pira’un bakata ka’ Yusup, “Batakatn ka’ na’ aka' man adi’nyu lenian; dikita' kamasi’ sigana palupuk kita’, da' taikatni' ka’ balikakng kaladae, baru' kita' pulakng agi' notok ka’ binua Kana’an, 18 pulakngi’ na’ pa’nyu man sigana urakng nang badiapm man kita’, jukut ke’ kita’ atakng ka’ keatn aku mare’atna’ abut nang miah gagas nang nda’ ka’ nagari Maser, biar kita’ misa’atni’ buah tanah abut keatn. 19 Nian parentahku ka’ kao, batakatn ka' kamar kapalanyu, lenian: Dikita' incakngi' kareta kuda mpat ka’ nagari Maser nian, yak dianak man bini kita’ taiki', dikita' baba uga’ apa' kita ka’ keatn. 20Ame kita’ labu ningalatni’ sigana jukut kita’ nang ka’ naun, ka’ keatn aku mare'atnna' sigana pamare' nang miah gagas ka’ kita’.” 21 Ahe nang dah di-Pira’un marentahatn koa da’ dina’ aka’nya ngarajaatn. Yusup da’ mare’atni' kareta Maser ka’ na' kamar kapalanya, lea nang di-Pira’un marentahatn, kamar kapalanya uga’ di-Yusup mare’ bahata yak pamakanan ka’ maraga. 22 Ia ka’ koa di-Yusup mahatai’ kasalinan singkajah sabalah, Benyamin dinya mare’ kasalinan lima balah, uga’ duit perak talu ratus ete’. 23 Pa’nya di-Yusup ngiripmi’ kaladae laki man kaladae bini singkajah sapuluh eko’, nang ka' balikakngnya ngincakngi’ sigana aluatn nang gagas, uga’ gandum, roti man pamakanan na’ pa’nya ka’ maraga taka’nya ataknga’ ka’ nagari Maser nae. 24 Laka’ koa Yusup da’ ngantat na’ kamar kapalanya batulak, ja katanya, “Ka’ maraga nae ame kita’ baolek boh.” 25 Na’ kamar kapala Yusup da’ batulak mpat ka’ nagari Maser notok ka’ binua Kana’an, ka' kampokng kabatnnya. 26 Taka' kabatnnya dah namus ka’ na’ pa’nya, ia ka’ koa bagesah lenian, ”Yusup gi’ idup, ampeatn ia dah jaji mangku ka’ nagari Maser.” Yakop ina’ da’ pucaya ka’ gesah na’ naknya koa, tagal koa ia ina' repo nangarnya. 27 Pasatn Yusup dikabatnnya matakatn uga’ ka’ pa’nya, lekoa uga' kareta kuda nang di-Yusup ngiripmi’ yak mulakngia’ pa’nya, dikabatnnya nele’atn uga’ ka’ Yakop. Nele’ jukut ka’ koa baru’ Yakop da’ basumangat agi’, ia jaji pucaya’ ka’ gesah na’ naknya koa. 28 Ja kata Yakop ka’ na’ naknya, “Ampeatn aku baru’ pucaya’ kade’ Yusup gi’ idup, tagal koa aku mao’ nele’a’nya sanape’ku mati.”

46

Yakop man page warisnya melah ka' nagari Maser

1 Taka' Israel batulak ka’ nagari Maser, sigana pakakas nang dinya ngampu'i', dinya ngincakngi’ uga'. Taka’nya dah namus ka' kampokng Barseba, ia da' mareatn paramu-paremah ayapm-pangidup nandahatn sorok-sambah ka’ Jubata nang dipidara Isak nyambah. Isak koa apa' Israel. 2 Malam arinya Yakop di-Jubata ngatakngi', ja kata-Nya ka’ Yakop, “O Yakop!” Ja kata Yakop nyahuti’ Jubata, “Ao', ahe ba ja Kita’ Jubata.” 3 Ja Jubata ka’ ia, “Aku nian Jubata nang dina’ pa’nyu nyujukng-nyambah, ame nyu gali’ ampus ka’ nagari Maser, jukut ka’ naun piturutnnyu di-Ku jajiatna’ suku-bangsa nang miah raya. 4 Aku ihan nang ngingu-ngoan man ngarere' kao ka’ naun, Aku uga’ nang ngantata’ kao mulaknga' agi’ ka’ keatn, uga’ kokot Yusup nang ngalikupatna’ matanyu ke’ kao dah pulakng ka’ Aku.” 5 Yakop da' batulak mpat ka’ kampokng Barseba, ia dina’ naknya maba barage man na’ minatunya man na' ucu'nya, ngiak kareta kuda nang di-Pira'un ngiriman yak mulakngi’ Yakop. 6 Sigana laok ayaman man pakakas, uga' sigana jukut nang dikabatnnya namu taka’ badiapm ka' binua Kana'an dikabatnnya ngincakngi'. Sigana page-waris Yakop da' namus ka’ nagari Maser. 7 Anak ucu’nya nang laki man nang bini, sigana piturutnnya dinya maba ka’ nagari Maser.

26 Panganak Yakop nang baampusatn ka' nagari Maser etongan urakngnya anam puluh anam. Minantunya nang baampusatn man ia ka' koa ina’ tama' ka' etongan. 27 Panganak Yusup nang nda ka’ nagari Maser etongannya dueko'. Etongan nak laki Yakop nang ka’ nagari Maser urakng tujuh puluh. 28 Yahuda di-Yakop nyuruh bajalatn doho’ namui' Yusup, biar Yusup atakng ka’ binua Gosen ngampusi'nya. Taka’ koa kabatnnya dah namus ka’ binua Gosen.

29 Yusup da' naiki' karetanya ampus ka’ Gosen notok na’ pa’nya. Taka'nya batamu, ia da' ngapakng pa'nya, lama uga' ia takeak ka’ bahu pa’nya. 30 Yakop da' bakata ka’ Yusup, “Ina' ngahe ge' ampeatn aku mati, jukut aku dah nele’ muhanyu man nau’an kade’ kao gi’ idup.” 31 Laka' koa Yusup da' bakata ka’ sepusatnya man ka' na’ kamar kapalanya, ja katanya, “Ampeatn aku ngampusia' Pira'un doho', babataka' ka' ia kade' na’ pa’ku man na’ page warisku nang mpat ka’ binua Kana'an dah baatangan ka’ keatn. 32 Diku bataka' ka' Pira'un kade' kita' nian pamihara kambing-domba man karabo-sapi, sigana piharaatn kita' dah dikita' ngincakngi’ ka’ nagari Maser. 33 Ke’ nae pakarajaatn kita’ di-Pira'un tanyaan, 34 batak ja' lenian: Ulutn kita' nian pamihara laok ayaman, mulai' kami gi’ enek namus ka’ ampeatn, uga’ ene’-uyam kami ngka' dah asalnya pamihara laok ayaman. -- Biar kita’ dinya suruh badiapm ka’ binua Gosen nian.” -- Yusup bakata lekoa tagal sigana urakng nang jaji pamihara kambing-domba diurakng Maser matak tungkal.

47

Yakop ngadap Pira'un

1 Laka’ koa Yusup da' batulak notok Pira'un. Pira'un dinya mare’ nau’an, ja nya, ”Pa’ku man na’ page- warisku dah atakng mpat ka' binua Kana'an , sigana pakakas man kambing-domba, karabo-sapi nang dina' page warisku ngampu’i’ dah dina kabatnnya ngincakngi’. Ampeatn ia ka' koa dah namus ka’ kampokng Gosen." 2 Taka'nya ngadap ka' Pira’un, kamar kapalanya urakng lima di-Yusup maba uga’  barage  man ia. 3 Kamar kapala Yusup da' di-Pira'un nanyai', “Ahe pakarajaatn kita'?” Ja kabatnnya nyahuti’ Pira'un, “Ulutn kita' nian pamihara domba, mpa koa uga’ ene’-uyam kami ngka' dah asalnya pamihara laok ayaman." 4 Ja na' kamar kapala Yusup agi’ ka’ Pira'un, “Kami nian nta mao' badiapma’ ka’ nagari nian jaji urakng atakng, jukut pansa timaro nian miah kuat, nana’ barumput agi’ marea’ pajuh sigana laok ayaman kami ka’ binua Kana'an , tagal koa ke' dikita' porongan, kami mao' sidi badiapma’ ka’ binua Gosen.” 5 Laka' koa Pira'un da' bakata ka’ Yusup, “Pa’nyu man na' page warisnyu dah atakng notok kao. 6 Sakulilikng nagari Maser nian baya dinya ka' koa diapmi’, dinyu gago’atn ja’ abut nang miah gagas yak dina' page warisnyu diapmi'. Ia ka' koa da' dinyu porongan ma'an badiapm ka’ binua Gosen. Kade' nda kamar kapalanyu seko'-dueko’ nang rancakng karaja, dinyu suruh ja' jaji pamihara laok ayamanku.” 7Taka’ Yusup ngadap Piraun, pa’nya di-Yusup maba uga’. Lekoa batamu man Pira’un, Yakop da' nyampangan tuah-untukng ka’ Pira'un. 8 Baru' Yakop di-Pira'un nanyai', ”Ke’ aku baya nau’an dah sangahe ba omor kita'?” 9 Ja Yakop ka' ia, “Ke’ diku etong sangahe lamanya aku johakng jaji urakng atakng ka’ nagari urakng, etongan tahutnya dah saratus talu puluh. Omorku gi’ ina’ sangahe, uga' gesah idupku nian ina’ sangahe gagas, ke' diku tele’ lamanya tahutnku johakng, ina' lea omor na' ene’-uyamku, taka’ ia ka' koa johakng jaji urakng atakng." 10 Jurut koa Yakop da' basampakng, biar Pira'un di-Jubata bare’ tuah-untukng. Baru’ ia da' batulak ningalatn Pira'un. 11 Lea nang di-Pira'un marentahatn, Yusup da' ngantat na’ pa’nya man na’ kamar kapalanya ka’ abut pinaha badiapma’ man mare'atn palasar-palaya' yak paridup ia ka' koa. Abut koa sidi miah gagas, ina’ nda nang ngalahatn gagas’nya koa ka’ sigana nagari Maser. Abut koa damanya Ramses. 12 Na’ pa’nya samianakatn di-Yusup mare' paridup, ia nang mare’i’ sigana page-warisnya pamakanan nurutatn etongan ia anak-baranak.

Pansa Pangalaparatn miah Kuat

13 Sigana pamakanan dah kamakng ka’ sakulilikng nagari Maser, pansa pangalaparatn koa nta miah kuat, tagal koa urakng ka’ binua Kana'an man ka’ sakulilikng nagari Maser nta kasusahatn, urakng ka' koa ina' mangongo man ina’ bakaheatn tagal dikaparatn. 14 Yusup ngomo'ani’ sigana duit nang diurakng Kana'an man urakng Maser ka’ koa ngahiak yak mayari’ gandum. Duit koa dinya ngincakng ka’ istana Pira'un. 15 Taka' duit urakng binua Kana'an man urakng Maser dah' abis, yak dikabatnnya maliatni’ pamakanan, sigana urakng Maser ka' koa da' ngampusi' Yusup, ja kabatnnya, “Kami nian dah ina’ baduit agi’ yak malia’ pamakanan, uga’ kami nian dah matia’ tagal na’ makatn, mpahe kita’ mikiri’ kami nian, biar kami nian baya namu pamakanan." 16 Ja Yusup ka' kabatnnya, "Ke’ kita’ dah ina’ baduit, dikita tukar ja’ man laok ayaman kita’, pane aku mare’ kita’ gandum." 17 Laka' koa urakng Maser ka’ koa da' ngincakngi’ laok ayaman yak nukara’nya man gandum ka’ Yusup. Ari satahutn koa, sigana paringa laok ayaman: paringa kuda, kambing-domba, karabo-sapi man kaladae singkajah sakabatn di-Yusup nukar man gandum. 18 Laka’ ari satahutn, tahutn sote’ jurut koa kabatnnya da' atakng agi’ ka’ Yusup, ja kabatnnya, “Kami nian bakata sasidinya ka’ kita’, ampeatn duit man sigana laok ayaman kami dah rapot yak mali’i’ pamakanan, ampeatn nang nda ka’ kami sabatang tubuh man tanah kami ihan. 19 Ame boh kami dikita porongan mati! Dikita’ bali ja' tanah man diri' kami yak nukar pamakanan. Na’ ngahe ba kade' kami jaji ulutn Pira'un man tanah kami jaji nu' Pira'un. Uga’ dikita bare’ kira'nya ka' kami banih yak kami bahumaa’, biar tanah tatap gagas, kami baya idup ina’ bamatiatn.” 20 Laka' koa sigana tanah urakng Maser di-Yusup mali, tagal koa tanah urakng ka' koa jaji nu’ Pira'un. Jukut urakng Maser ka’ koa singkajah nukari’ tanahnya man pamakanan, tagal dipansa pangalaparatn nang sidi miah majara kabatnnya. 21 Uga’ sigana urakng Maser ka’ ujukng man pungka’ nagari koa di-Yusup nyajiatn kuli Pira'un. 22 Tanah nu’ panyangahatn ihan ja’ nang ina’ dinya bali, jukut kabatnnya dah namu agiatn pamakatn mpat ka’ Pira'un, tagal koa tanahnya ina’ dikabatnnya juali’. 23 Yusup da' bakata ka’ sigana urakng Maser ka’ koa, ja katanya, ”Ari nian tanah man diri' kita’ dah jaji nu’ Pira'un, jukut kita’ dah dinya mali. Nian banih diku bare’i’ ka' kita’, biar kita' nanami’nya ka' uma. 24 Nae anyiannya dikita' bare'atn dua agiatn ka’ Pira’un, lapan agiatn ka' kita’ yak dikita’ banih man mare’i’ sarumahan kita’ makatn.” 25 Ja kabatnnya ka’ Yusup, “Kami dah dikita’ mare' paridup, na' ngahe ke’ kami bakuli ka' Pira'un." 26 Ahe ba, namus ka' ampeatn adat Yusup koa gi’ diurakng nurutatn ka’ nagari Maser, dua agiatn buah tanah diurakng sarahatn ka’ Pira'un. Tanah sigana panyangahatn ihan ja’ nang ina’ di-Pira'un ampu’i’.

Pasatn Yakop nang pangabisatn

27 Lekoa ba panganak Yakop mulai' badiapm ka’ nagari Maser, ka’ binua Gosen, jaji urakng asal abut koa. Ka' abut koa panganak Yakop baranak-barucu’ sia’ raya. 28 Ka’ nagari Maser koa, Yakop gi’ idup ari tujuh balas tahutn, omor Yakop taka’nya idup tabilakng saratus ampat puluh tujuh tahutn. 29 Taka’ Yakop dah matia’, Yusup naknya dinya nyaru’, ja katanya, “Kade’ kao ngka' kasihatn ka’ aku, dinyu laka’atn kokotnyu ka’ pungka’ pahaku, ampeatn kao da' basumpah, aku ame dinyu subur ka’ nagari Maser. Ngkoa tandahatnnya kade’ kao kasihatn man ngasi’atn kataku; 30 jukut aku dah matia’ bakomo’a' man na' ene’-uyamku, tagal koa nae bangkeku dinyu incakng mpat ka’ nagari Maser, notok ka’ subur ene’-uyamku.” Ja Yusup ka’ ia, ”Ao’ pane ja’ aku ngasi’atn kata kita’ koa pa’a.” 31 Ja kata Yakop ka’ ia, “Kade’ lekoa, da' basumpah kao ka’ aku.” Baru' Yusup da’ basumpah. Laka' koa, Yakop da’ ngogo'atn kapalanya ka' pinahanya tidur, siragenya babamakng ka’ Jubata.

48

Eparaim man Manase di-Yakop nyampangan tuah-untukng

1 Lama uga' laka' koa, nda urakng nang babatak ka’ Yusup, ja urakng koa, “Ampeatn pa’ kita' tagah rongko’.” Nangar mpa koa Yusup da' nabo' pa'nya, maba naknya nang dueko' nang damanya Manase man Epraim. 2 Nangar Yusup atakng, Yakop da' basatiar ngalumpatatn diri’nya, biar baya duduk ka’ pinahanya tidur. 3 Ja Yakop ka’ Yusup, “Ka’ kampokng Lus binua Kana'an , Jubata Nang Pama-Nya Na’ Batampus dah madahatn diri’-Nya ka’ aku, tuah-untukng di-Nya mare’atn ka’ aku. 4 Ia uga’ dah bajanji ka’ aku, ja kata-Nya, "Kao di-Ku bare'a' anak-ucu’ nang miah batea', Piturutnnyu di-Ku jajiatna’ badakah sukunya: binua nian uga' di-Ku bare’atna' ka' piturutnnyu, kabatnnya ngampu’a’nya taka' piturutnnyu gi' idup ka’ ai'-tanah nang lamanya na' bakasantukatn." 5 Ja Yakop agi, "Naknyu nang dueko’ koa, Epraim man Manase, nang dah dinyu maranakatn sanape’ku atakng ka’ nagari Maser nian, nyamadi’ koa jaji nakku uga’, lea na' Ruben man Simeon. 6 Naknyu nang dinyu maranakatn taka’ aku dah ka’ nagari Maser, ngkoa nang jaji nu'nyu. Taka' mahagiatni' tuah ai'-tanah, dama nyadua nang kana sabutatn nurutatn dama nyamadi’ nian. 7 Jukut de'e taka’ku gi' bajalatn mpat ka' binua Padan-Aram ka’ maraga notok binua Kana'an , aku diwe’nyu Rahel ningalatn mati. Abut koa dah samak man kampokng Eprata, ia diku nyubur ka' koa, ka’ samak maraga Eprata, -- nang damanya Betlehem. 8 Tatele’ ka' na' anak Yusup nang barage man ia koa, Yakop bakata ka’ ia, “Sae kamuda' nang dueko’ nian?” 9 Ja Yusup  ka' pa’nya, “Nian nakku nang dah di-Jubata mare’atn ka’ aku taka' ku ka’ keatn.” Ja kata Yakop agi', “Nyamadi’ koa dinyu samakatn ka’ aku, tuah-untukng diku sampangana’ ka’ nyamadi’ koa.” 10 Panele’atn Yakop dah puso jukut ia dah miah tuha, tagal koa paneleatnnya ina’ calikng agi’. Na’ naknya di-Yusup nyamakatn ka’ Yakop, nyamadi’ di-Yakop ngapakng man ngidung. 11 Yakop bakata ka’ Yusup, “Sidi na’ ku tau’atn kade’ aku batamua’ kao agi’, ahe agi' ampeatn aku di-Jubata morongan nele’ piturutnnyu.” 12 Nangar mpa koa nyamadi’ di-Yusup na'ap mpat ka' pangko'atn ne'nya. Baru' Yusup da' batu'ut, ngogo’atn kapalanya ka' lante ka' adapatn pa'nya, 13 Laka’ koa nyamadi’ di-Yusup nyamakatn ka' Yakop agi’. Epraim dinya ngalaka'atn man kokot kanannya ka’ sap keba’ Isarael, Manase dinya ngalaka'atn man kokot keba’nya ka’ sap kanan Israel, 14 Israel da' ngalaka'atn kokotnya nang kanan ka’ bubutn Epraim cu'nya nang muda, kokot keba’nya dinya ngalaka'atn ka’ bubutn Manase cu'nya nang tuha -- kokotnya dinya mapalangan ka' bubutn kamuda nang dueko’koa. 15 Laka’ koa ia da' nyampangan tuah-untukng ka’ Yusup, ja katanya, “Jubata nang dipidara ne’ku Abraham man pidara pa’ku Isak nyujukng-nyambah, nang dah ngingu aku saomor idupku namus ka' ari nian. 16 Uga’ nang dah jaji Mala’ekat nang nyalinukngi’ aku, sigana jukut nang ina' gagas dah di-Nya ngela'atn ka’ aku, aku bapinta’ ka’ Kita’ Jubata, kira’nya di-Kita’ bare’atni’ tuah-untukng uga’ ka’ kamuda’ nang dueko’ nian, kira’nya damaku, dama pidara ne’ku Abraham man pidara pa’ku Isak pamanya basaragah ka’ sigana urakng, tagal dinyamadi’ nian, kira’nya etongan katurunan nyamadi’ nian sia’ raya man badakah ka’ sigana abut.” 17 Nele' kokot pa'nya nang kanan dinya ngalaka'atn ka’ bubutn Epraim, Yusup da' basatiar ngulahatna' kokot pa'nya ka’ bubutn Manase. 18 Ja katanya ka' pa’nya, “Na’ ke’ kita’ salah pa’, jukut nang nian nang tuha, ulah ja’ kokot kanan kita’ koa ka' nang nian." 19 Yakop bai’ ngasi’atn kata Yusup koa, ja katanya, “Nau’an ba aku naka, nau’an! Manase nae jajia’ suku-bangsa, ia uga jajia' urakng nang basaragah. Biar ga’ lekoa, Epraim saragahnya miah aya', uga’ piturutnnya jajia’ suku-bangsa nang raya.” 20 Nyamadi’ di-Israel nyampangan tuah-untukng, ja katanya, “Nae urakng Israel nyabutatna’ damanyu taka’ nyampangan tuah-untukng. Lenian; kao kira'nya di-Jubata bare'a' tuah-untukng lea Epraim man Manase.” Lekoa gesahnya Epraim di-Israel noho’atn, Manase dinya ngadudiatn. 21 Laka’ koa Israel da' bakata ka’ Yusup, ja katanya, “Parasaku ina’ lama agi’ aku dah matia’, ke’ ku dah nana’ nae, Jubata nang jajia' pangingu, pangoan man pangarere' kita’, Jubata nang ngiriknga’ kita’ pulakng ka’ nagari asal ene’-uyam diri’. 22 Ampeatn kao diku bare’ abut nang ka' tarabis bukit, nang dah diku ngarampas taka’ baparang man urakng Amori, abut koa ina' diku bare'a' ka' na' kamar kapalanyu.

49

Yakop matakatn ahe nang jajia' ka' na' naknya nae

1 Laka’ koa Yakop da' nyaru’i' sigana naknya, ja katanya, “Kita’ adi’-baradi’ babubuhatn atakng ka' keatn, aku mao' matakatna' ka’ kita’ sigana nang jajia’ ka’ kita’ nae’.”

2 Ao' kita’ ayukng bajujuh-page samadi’atn sigana panganak Yakop,

ampeatn kita' da' bakomo’ doho’ dangaratn aku,

dikita' dangaratn pasatn Israel, apa’ kita’.

3 Ruben, kao nian nakku nang tuha,

nang diku maranakatn taka' ku gi' muda', pamule kagagahatnku,

kao nang labih babasa man miah basaragah.

4 Kao lea ai’ anyut, nang na' baya dipagukng,

tagal koa kao ina’ agi jaji tuha dangan,

jukut kao dah niduri' man ngotori katiduratn na' pa’nyu,

kao dah babaya' ka' pinahaku tidur.

5 Simeon man Lewi nang satali-darah,

pakakas parang nyamadi’ jaji pakakas yak babunuha’.

6 Ame kira'nya sumangatku nurutatn tabeat nyamadi’,

ame kira'nya sengatku bahaupm man pakat nyamadi',

jukut taka’ nyamadi’ bera, nyadua dah munuhi’ urakng,

tagal dikabera'atnnya, nyamadi' dah natak urat tumirat karabo yak nyamadi' barepo-repo.

7 Kabera'atn nyadua kira’nya disumpah pajuh,

jukut nyamadi' miah pamera,

kaisiman nyadua kira’nya disumpah pajuh,

kaisiman nyamadi' kaja ngarusak.

Nyamadi' koa diku pahagiatna' ka’ tea’ kamar kapalanya,

nyadua diku ngansar dari ka’ tea’ na' nakku.

8 Yahuda, kao dikamar kapalanyu kajia’,

tangko’ kayonyu dikokotnyu tikitna',

ka’ kao sigana panganakku bubuha' sorok-sambah,

9 Yahuda jajia’ lea singa,

laka’ narakam ia naik ka’ abut tingi.

Ia batiharap man gurikng lea singa laki man singa bini;

sae nang barania' ngalumpatatnnya?

10 Tungkat karaja'an ina’ lapasa’ mpat ka' kokot Yahuda,

nandahatn pamarentahnya ina’ baginsita’ mpat ka' ia,

namus ka’ urakng nang pantas narima'nya,

suku-bangsa sorok-sambaha' ka’ ia.

11 Kaladaenya dinya nengo' ka’ raputn anggur,

lekoa uga' kaladae muda' dinya nengo' ka’ raputn anggur nang badaukng libar man babatang lanso’,

pahiaknya dinya sasaha' man buah anggur,

man parahatn anggur pahiaknya dinya sasaha'.

12 Matanya calaha’ tagal diai' anggur,

giginya putiha’ tagal diai' susu.

13 Sebulon, basisiatn man ai' laut kao badiapma’,

ia jajia’ pinaha kapal balabuh,

ntaranya basisiatn man Sidon.

14 Isakar, kao lea kaladae nang batulakng kuat,

nang tiharap dipalupuknya ngapet,

15 taka’ dinya nele’ abut nang gagas,

nagari nang ngarere'atn ati,

ia da’ mare'atn bahunya bapikuta’, bakuli ka' urakng.

16 Nakku Dan, kao jajia' pangaraga nang ngaraga suku-bangsanyu,  ka’ suku Israel kao tabilaknga'.

17 Kao lea ular nang babisa kuat ka’ maraga

ka’ sisi maraga kao nganti'atna',

nang matok tumit kuda,

nyajiatn tatulak jantu' urakng nang naiki'nya.

18 Ao’ Kita’ JUBATA, dah lama ihannya aku nganti'atni' Kita’ ngingua' aku.

19 Gat, kao dikabatn urakng jahat sarabua’,

taka’ kao dikabatnya nyajakng,

tumit kabatnnya dinyu ngaramuhatn.

20 Aser, pamakatnnyu miah nyaman man nta batea’,

pamakanannyu lea pamakatn raja.

21 Naptali, kao lea ganye bini nang lapas,

maranakatni' kamuda' nang tarigas.

22 Yusup, kao lea puhutn buah nang gi’ muda’,

ka' sisi mata ai’ kao idupa',

dinikng nang tingi limpas didahatnya.

23 Sigana urakng nang bapanah marangi’nya,

man panah dangannya ngujatni’nya ,

24 panahnyu tatap na’ baginsit,

kokotnyu tahan bakuit,

tagal di-Jubata nang jaji Pangingunyu,

nang dah nyalinukngi’ man ngingu Yakop,

jaji Bukit Batu Israel.

25 Jubata nang diku nyambah, Jubata nang Pamanya na' Batampus nyalinukngia’ kao,

tuah-untukng mpat ka' uwa'-uwang di-Nya bare'atna' ka' kao,

mpat ka' babah ai' laut nang miah luar kao namu tuah-untukng,

kira'nya kao di-Nya bare' tuah buah dada man tuah buah buntikng.

26 Tuah untukng pa'nyu ngalimpasatn bukit nang dah batongor,

tuah-untukng nang miah raya turutna’ ka’ bubutnnyu,

ka’ bubutn Yusup nang ngalabihi’ na' kamar kapalanya.

27 Benyamin, kao lea asu' udas nang narakam laok,

taka’ alapm ia da' majuhi' panamunya,

taka’ ari gumare’ sigana jukut nang dah dinya ngarampas,

dinya nyolo’atni’ ka' dangannya.”

28 Talah naknya nang tabilakng dua balas, nang dah di-pa'nya nyabutatn koa, ia ka' koa nang jaji suku Israel. Miakng eko'nya singkajah namu tuah-untukng nang dah di-Yakop nyampangan.

Yakop mati

29 Laka’ koa Yakop da' bapasatn ka’ na’ naknya, ja katanya, “Ke’ nae aku dah pulakng ka’ saruga, notok na’ pa’ man na’ ne’ku, aku dikita’ subur ka’ sisi pinaha ene’-uyamku, ka’ lala uma Epron, urakng Het. 30 Ka’ dalapm goa nang ka' uma Makapela nang samak man Mamre marikng mata'ari tarabit, ka’ binua Kana'an, uma koa dah dipidara ne’ku Abraham mali ka’ Epron, urakng Het koa yak diene’-uyam diri' nyajiatn subur diri’ samianakatn. 31 Ka' koa pidara na' ne’ku Abraham man ne’ Sara samilikatnnya dikami nyubur, lekoa uga pidara na' pa’ku Isak man we’ku Ripka dikami nyubur ka' koa. 32 We’ kita’ nang damanya Leya diku nyubur ka' koa uga’, jukut mototn man goa koa dah dine'ku mali ka’ urakng Het koa.”

33 Laka' Yakop bapasatn ka' na' naknya, ia da' kajor ka' pinahanya tidur, pulakng bakomo' man na' ene’-uyamnya.

50

1 Nele’ pa’nya dah nana’, Yusup da' ngarabahatn diri’nya siragenya ngeak, pa’nya dinya ngapakng man dinya ngidung. 2 Laka' koa Yusup da' marentahatn ka’ ulutnnya nang tukang pangawet bangke yak nguntusatni' binyak pangawet man pamangat ka' bangke Yakop. 3 Kabatnnya da' manjawat ahe nang di-Yusup marentahatn, ampat puluh ari kabatnnya ngaraja'atnnya. Yakop diurakng Maser nganang tujuh puluh ari. 4 Taka' dah' laka' ari kabatnnya bakanang, Yusup da' bakata ka’ sigana pamane man pagalar-pajanang nang ka’ istana Pira'un, ja katanya, “Ke aku dikita’ kasihatni’ padahatn ka’ Pira'un, 5 pidara pa’ku dah nyuruh aku basumpah, ja katanya; na’ lama agi’ aku dah matia’, nae ke’ aku dah mati, aku mao’ dinyu subur ka' subur nang dah diku namukng ka’ binua Kana'an. Lekoa ba pasatn pa'ku, tagal koa aku bapinta’ ka’ kita’ biar Pira’un morongan aku nyubura' pa’ku ka’ abut koa, laka’ koa baru’ aku mulakng agi’ ka’ keatn.” 6 Ja Pira'un ka’ Yusup, “Na’ ngahe ba kao ampus uga’ basubur, lea sumpahnyu ka' pidara pa’nyu. ” 7 Yusup da' ampus nyubur pa’nya, barage man ia baampusatn uga' sigana pagalar-pajanang Pira'un man sigana tuha istana Pira'un, uga’ tuha kampokng ka’ sakulilikng nagari Maser. 8 Lekoa uga' sigana urakng nang badiapm ka’ rumah Yusup man sigana panganak pidara Yakup man sigana urakng nang badiapm ka’ rumah pidara Yakup baampusatn uga’; sigana kamuda’ man laok pahayaman ja’ nang dikabatnnya ningalatn ka' binua Gosen. 9 Urakng nang bakareta kuda man sigana urakng bakuda baampusatn uga’ basubur, kabatnnya ka' koa sidi miah badakah. 10 Taka’ kabatnnya dah namus ka’ Goren-Ha'atat, ka' subarang ai' batangan Yordan, ka' koa kabatnnya da' bakeakatn, keaknya ka' koa sidi miah riuh; lamanya tujuh ari pidara pa’nya di-Yusup man sigana urakng ka’ koa nganang. 11 Nele’ kabatnnya nang ka’ Goren-Ha'atat koa sidi miah rami man keaknya miah riuh, urakng binua Kana'an koa da' bakata, “Nian ari kamatiatn urakng Maser nang miah riuh.” Tagal koa kabatnnya da' mare' dama abut koa Abel-Misraim, abut koa ka’ subarang ai' batangan Yordan. 12 Sigana nang dipidara pa’nya masanan dina' panganak pidara Yakub ngasi'atni'. 13 Bangke pa’nya dipanganak pidara Yakub ngincakng ka’ binua Kana'an . Ia dina' naknya nyubur ka’ goa nang ka’ mototn Makapela, rame uma nang dah di-Abraham mali ka’ Epron urakng Het, mototn nang ka’ kampokng Mamre marikng mata'ari tarabit, yak jajia' subur nu’ na’ piturutnnya, 14 Laka’ nyubur pa’nya, Yusup man na' kamar kapalanya uga' sigana urakng nang ampus man ia da' mulakng agi’ ka’ nagari Maser.

Na' Kamar kapala Yusup di-Yusup ngeapatn

15 Ahe ba, nele’ pa’nya dah nana', kamar kapala Yusup bakata, “Sae tau’atn Yusup gi’ bera ka’ diri’, ke’ ia gi’ teget ka’ diri’, na’ ge’ ia malasatna’ sigana kajahatatn diri’ ka’ ia are'.” 16 Tagal koa na' kamar kapalanya da' bapasatn ka’ Yusup, “Sanape’ pidara apa’ mati, ia dah bapasatn; 17 Kao kira’nya ngapusatn sigana-sangar salah na' kamar kapalanyu ka’ kao. Ia ka' koa dah batabeat jahat ka’ kao. Lekoa ba pasatn pa' kita', tagal koa ampeatn kira’nya kita' mao’ mare’ ampon ka’ na' kamar kapala kita', ulutn Jubata nang diapa’ kita' nyambah." Nangar pasatn koa, Yusup da' takeak. 18 Laka' koa na’ kamar kapalanya baatangan notok ia, ka’ adapatnnya kabatnnya da' batu'ut sirage bakata, “Kami baatangan nian jajia’ ulutnnyu.” 19 Yusup nyahuti ka' na' kamar kapalanya, “Ame ba kita’ gali’ ka’ aku, jukut aku nian nta buke’ Jubata. 20 Kita’ ngka’ dah ngarengka jukut nang jahat ka’ aku, Jubata ja' nang dah majajinya kabaikatn ka’ aku, jukut tagal dikita’ Jubata dah majaji sigana nang didiri’ nyalatni’ ampeatn, mihara man ngidupi’ suku-bangsa diri’ nang raya. 21 Tagal koa kita’ ame gali’, aku nang nanggong pamakanan kita’ man sigana kamuda' kita’." Lekoa ba kata Yusup nang dinya matakatn taka' ia ngeapatn ati na’ kamar kapalanya.

Yusup mati ka' nagari Maser

22 Yusup man na’ kamar kapalanya jaji urakng asal ka’ nagari Maser, etongan omor Yusup saratus sapuluh tahutn. 23 Ia gi’ nda nele’ na' anak man ucu’ Epraim namus ka' uyutnya. Uga ucu' Yusup nang damanya Makir nak Manase, na' naknya dinya maranakatn ka’ pangko’atn Yusup. 24 Yusup da' bakata ka' na’ kamar kapalanya, ja katanya, “Ina’ lama agi' aku dah matia'; kade' aku dah nana' nae Jubata nang ngirikngia’ kita’, Jubata uga' nang ngingua' kita' notok ka' nagari nang di-Nya bareatna' ka' pidara na' pa' diri' Yakop, ne' diri' Isak man ne' uyut diri' Abraham.” 25 Laka' koa anak-baranak Yakop di-Yusup nyuruh basumpah, ja katanya, “Nian pasatnku ka’ kita’, nae ke’ Jubata dah nyuruh kita’ notok ka' nagari koa, dikita’ icakngi’ uga’ tulakngku.” 26 Laka' koa Yusup da’ mutusatn sengatnya, taka' koa omornya saratus sapuluh tahutn. Bangkenya dina' anak-baranaknya nguntusatni' binyak pangawet man pamangat bangke baru' dikabatnnya nama'an ka’ dalapm pati.