"Biar kata gratis kan kagak semua orang juga bisa kayak gitu, Mpok Hajjah."
"Nah, lu gua demen. Pengertian. Mau manggil gua bu hajjah. Bukan kayak orang-orang tuh yang pada kagak tau diri."
"Tapi, umroh emang beda ama haji, Mpok Hajjah."
"Ya beda-beda tipis kan? Apa salahnya si mereka manggil gua bu hajjah? Emang kagak boleh orang baru umroh dipanggil haji atawa hajjah?"
"Bukan kagak boleh, Mpok Hajjah. Sekarang pan Mpok Hajjah bisa liat kendiri. Asal ada orang pake kopiah haji dipanggil Pak Haji padahal umroh aja belon."
"Nah, tu lu tau pan. Jadi apa salahnya mereka nyenengin ati gua. Panggil gua bu hajjah. Kan kagak bayar juga. Kagak rugi juga."
"Iye...iye...saya paham, Mpok Hajjah."
Pulang dari rumah Usdadz Husin, Rodiah disambut anak perempuannya, tempat di mana dia tinggal.
"Mak. Orang-orang bilang Mak sekarang aneh."
"Aneh? Aneh kenapa?"
"Setelah pulang umroh kok Mak malah jadi budeg? Emang Mak di sonoh kejedot apaan, Mal?"
