Jemidi pancen pinter. Dheweke percaya ning sirahe sing dithukuli rambut kriting iku nduweni pemikiran sing jitu. Salah sijine strategi pemasarane Jemidi yaiku lagu-lagu koplo sing diputer ning speaker gerobake. Mula pelanggan padha niteni yen Jemidi liwat mesti keprungu swara dangdut. Jemidi kerep oleh undangan dodolan ning acara senam, manten, jathilan lan festival. Jemidi Cilok Dangut dipercaya bisa ngundang uwong lan penonton. Malah sasi wingi diundang ning Semarang.
Senajan wis kondhang, Jemidi wegah aing-aing. Panggah dadi tukang cilok gerobak keliling lan mangkal ning alun-alun.
Jemidi prasasat dadi idola kanggo cilok lovers, dianggep tokoh kuliner sing nyentrik lan mesti ditunggu anggone gentayangan. Ananging jenenge wong mesti nduwe haters. Haters e Jemidi iku bapak-bapak sing cemburu amarga bojone kerep ngalem-alem Jemidi.
"Aku sengit tenan karo tukang cilok kae. Yen liwat ngarep omahku arep dak gusah!" celathune Pak Tungin. Atine kemropok ngerti bojone pamite tuku cilok nanging jebule ndadak joget-joget ning gerobake Jemidi. "Yen arep joget-joget kuwi nang ngomah wae. Ora usah ning gerobake Jemidi!"
Pak Semprul uga gething karo bojone yen krungu swara dangdut banjur semrinthil marani, ananging menawa diundang bojone malah api-api ora krungu. Sing banget sengit yaiku Pak Jemidi domeh jenenge padha, dheweke saben dina karo bojone dipadha-padhakake karo Jemidi Cilok Dangdut. Mangkel ora kena diampet maneh.
"Kowe aja liwat kene meneh! Bojoku luwih semrinthil krungu dangdutmu kuwi timbang aku," bengoke Pak Semprul.
Akeh sing seneng uga mesti ana sing serik. Jemidi suwe-suwe wegah yen disalahake karo haters sing kerep gawe dagangane ora lumaku lancar. Jemidi sing rumangsa ora nduweni salah mung meneng wae. Niate mung siji yaiku dodolan. Dheweke ora nduwe niat sing kepiye-kepiye. Perkara ibu-ibu padha seneng joget-joget ning sanding gerobake iku wis udu urusane.
"Menawi mboten remen garwanipun mundhut cilok lan joget-joget wonten gerobak kula, panjengenan saget nengga garwanipun." Jemidi sidane muni-muni. "Mangkih panjenengan kula gratisi setunggal sunduk cilok."
Jemidi Cilok Dangdut sansaya rame lan kondhang. Dagangane cepet entek. Mulih-mulih Jemidi mesti mrenges lan atine bungah. Ananging haters e Jemidi jebul ora mung bapak-bapak, malah kalebu pacare dhewe, Minul.
Minul kudune seneng ngerti pacare pinter golek duit, daganane rame lan laris. Ananging ora kabeh dadi atine. Dheweke ora seneng weruh pacare dirubung wong wadon lan joget-joget.
