Nawala saka Ibu Bumi
Dening: Bening Christalica
Manungsa, aku kepengin takon marang kowe, apa padha tau krungu ukara Kasih ibu sepanjang jalan, kasih anak sepanjang penggalan? Ya kaya mangkono iku nasibku saiki, dadi ibu lan kowe para manungsa dadi anak-anakku. Asih tresnaku marang kowe sakdawane dalan, dene asih tresnamu marang aku mung sadawane garisan.
Jenengku Ibu Bumi. Ing Indonesia aku asring kasebut Ibu Pertiwi. Nanging kena ngapa masyarakat nyebut aku ibu? Masyarakat donya uga nggambarake aku kanthi rupa watak feminim. Aku kasebut earth amarga asalku saka tembung Terra Mater, yaiku asma sawijining dewi Yunani sing tegesé mother earth utawa ibu bumi.
Aku kasebut ibu lan digandhengake watak kang feminim amarga watakku meh padha karo watak ibu utawa wanodya manungsa. Ibu manungsa nglairake, ngramut, momong, lan nguripi anak-anake. Semono uga aku, aku uga nglairake, ngramut, momong, lan uga nguripi sawarnaning kang urip ing sandhuwurku.
Aku nukulake sawernaning wiji sing banjur dadi sawernaning tanduran lan wit-witan kanggo sumber pangan, sandang, utawa papan manungsa utawa sato kewan liya. Aku cawis banyu kanggo ngombe kabeh wewujudan kang urip. Aku nyediakake papan kanggo ngaso lan ngeyup. Aku nyedhiyani maneka warna barang tambang kanggo uriping manungsa. Aku nyedhiyani maneka warna saka alam supaya dadi sumber panguripan.
Saiki aku dak takon marang kowe, para manungsa. Apa kowe padha ora isin dadi manungsa? Kewan-kewan kae padha njupuk sakperlune saka aku. Nanging kowé padha srakah. Kowe padha njupuk lan njupuk akeh saka aku nanging lali genti aweh marang aku. Kepara kowe malah padha gawe polusi sing marai aku ora subur, kewan lan tanduran uga padha mati. Apa sing wis mbok wenehake marang aku kanggo gantine apa sing wis dak wenehake marang kowe?
Sadawane jaman aku asring mbok eksploitasi. Kowe padha nambang nganti gawe rusak lingkungan, gawe tatu ing awakku. Aku ngarani kowe kabeh kuwi sawijining wewujudan kang pongah. Dumeh Gusti wis maringi akal lan budi, kowe kabeh padha rumangsa nduwe hak ngolah aku njaba njero, kepara dadi lali njaga alam sing dadi sumber panguripanmu iki.
Dina iki aku pancen sengaja nyeluk kowe kabeh. Sawangen aku kanthi setiti. Rungokna kanthi permati tembang-tembang perihku sing keprungu lirih. Aku kepengin ngandhani laraku ora kanthi bengok-bengok. Aku kepengin mencok ana atimu. Manungsa, wis suwe kowe padha lena nandur industri sinambi panen polusi. Sawangen lingkungan kiwa tengenmu sing ora bisa uwal saka rusaking ekosistem lingkungan.
Apa kowe sadar wis overfishing ana kalen kanthi nyetrum golek iwak? Apa kowe sadar wis mbuwang limbah lan peceren ana kali? Apa kowe uga durung sadar menawa sampah-sampah lan plastik sing mbok buwang ana kalen kae wis gawe kewan-kewan kalen kelangan omah? Meh kabeh iwak lan sato kewan kalen saiki wis musna. Sampah sing mbok buwang sembarangan kae uga marai mambu, marai hawa ora kepenak.
Wit-witan sing dadi sumber paru-paru lingkungan uga mbok tegori tanpa mbok tanduri maneh. Sakliyane alam iki dadi panas nggrantang, sato kewan sing manggon ana wit-witan uga suda, kepara saiki malah musna.
