Obor

obor, iku sedulur tuwaku
panggonmu neng gandok ora neng njeron omah
dines kerjanmu kaya timun wungkuk jaga imbuh
dibutuhke mung yen srengenge wis angslup
utawa yen ana sing kewengen lelungan
padhangmu mbirat pepeteng
cahyamu njalari
ora kelangan keblat
ora kesasar dalan

obor iku sedulur tuwaku
sunarmu gawe mripat isa ndeleng rupa ayu lan bagus
cahyamu gawe jaka kepranan kenya
pandhangmu gawe putri wuyung kakung

obor iku sedulur tuwaku
sing gawe mripat premana
sing marake wong kepranan
sing marai wong wuyung

ya kuwi obor, sedulur tuwaku
akeh wong sing dadi premana merga sliramu
akeh wong sing weruh lan nyawang sliramu
senajanta ora ana sing kepranan bagus lan ayumu
apameneh wuyung sliramu.

15.12.2018