Reueus, boga budak pinter jeung bageur. Prestasi di sakola nyongcolang, atuh sikepna di imah jeung masyarakat matak kayungyun. Kamari karek lulus UN SD. Nilai-nilai UN na galede, malah kasebut siswa nu nilai UN pangluhurna sa-kacamatan mah.
Aya niat nuluykeun ka SMP di kota kacamatan. Najan kuring nu jadi bapana ukur buruh tani, tapi ari keur kamajuan budak mah piraku teuing teu kaduga. Apanan sakolah jaman ayeuna mah cenah haratis, tinggal daekna.
Lain teu hayang nyakolakeun budak ka kota nu kualitasna cenah leuwih hade. Tapi dalah dikumaha, puguh keur kabutuhan sapopoe oge kurat-karet. Kamari ge, pedah wae dijujurung ku guruna. Lebar cenah ku nilai-nilai UN na nu hade, cobaan daftar ka SMP RSBI di kota. Keun cenah soal biaya mah urang usahakeun beasiswa. Sugan bisa ti ditu ti dieu, kitu ceuk guruna teh. Nya, harita si cikal teh amitan menta doa rek daftar ka sakola RSBI. Sugan jeung sugan aya milikna.
Kuring balik ti sawah haji Kamal babad galeng, basa si cikal geus nyampak dina golodog. Paromanna alum.
"Kumaha jang, enggeus daftar ka SMP RSBI teh? Kumaha hasilna?" kuring nanya. Saacan nyarita kaciri manehna narik napas panjang bangun nu beurat. Kuring geus bisa ngabaca naon pijawabeunana.
"Daftar mah daftar pa, ngan ceuk panitia teh cenah 'jang daftar ka dieu mah teu cukup ku angka UN nu galede wungkul, tapi kudu siap oge angka-angka nu galede dina rekening bank bapak ujang' kitu cenah pa"
"Ari kudu kitu mah, atuh pimanaeun jang! Apanan apal sorangan hirup urang teh sakieu ripuhna. Ari ceuk bapak mah geus we sakola mah di SMP kacamatan. Biayana moal beurat teuing ka bapa na. Nu penting mah hidep sing bener diajarna" ceuk kuring bari tuluy ngaleos ka pipir imah rek nyimpen pacul jeung kored. Teu wasa ningali budak nu mimti merebey cimata.
