PADA-pada wong urip, laka wong sing pengine melarat keblangsak. Pengine rayat cilik, uripe kejamin ning sandang, pangan, papane. Wetenge wareg, turune anget, nyandange rapet. Tapi nyatane pada enteng ning kocape, abot ning sanggane. Gonta-ganti pemimpin laka obahe, angger bae laka sejene.
Tugase pemrentah memang berat nggo ngladeni kepenginan rayat model kiye. Mugane kudu ngepas-pasi program sing jitu, tata tur terukur pembangunan. Pengarepane, ari ora bisa gawe maju, ya aja sampe malah dadi mundure. Kanda Brebes, durung lawas duwe bupati karo wakil bupati sing nembe anyaran senajan wong lawasan. Bupatine Hajah Idza Priyanti SE MH karo wakile Narjo SH, limang taun mengarep bakal diuji kemampuane gawe bungah rayat.
Wayah saiki, program pembangunan limang taunan atawa sapriode lagi disusun, wis diusulna ning DPRD Brebes, rupane Rencana Program Jangka Menengah Daerah (RPJMD) 2018-2022. RPJMD dadi salah siji jimate pemrentah nggo kerja mengarepe. Dadi dalan nggo mbuktikna visi misi sing wis gawe rayat kepincut ning kalane ana pencoblosan kepungkur. Tindaklanjutane RPJPD, anakane RPJMN. Angger jaman orde baru, mirip-mirip Repelita (rencana pembangunan lima tahunan).
Jare DPRD Brebese, RPJMD Brebes 2018-2022 sing disodorna kurang nyokot, masih ngawang-ngawang. Â Wajar ari ana kurange, mugane dewane ya bareng-bareng ngrewangi endi sing perlu ditambah, endi sing kudu ditugel sadurunge diparipurnakan. Kudu bisa dadi cekelan SKPD endah gawe renstrane aplikatif, fokus, konkrit aja fiktif. Naudzubillahi mindzalik...
Ibarat peribasa, desa mawa cara, negara mawa tata. Ora setiap daerah RPJMD kudu pada, kudu ngukur ning kebutuhan sing prioritas. Ora usah mblandrang mana-mana, apa maning copy paste. Permasalahan sing mendesak ning Kabupaten Brebes ya ulek udeng Indeks Pembangunan Manusia (IPM), faktore pengukure masalah ekonomi atawa kesejahteraan rakyate, kesehatan karo pendidikane. Karo sing wajib ya infrastruktur. Dadi pembangunane kuwe anjog ning rayat. Ora padi yuyu rumpung, mbarong ronge. Delenge apik hebat, jebule rayate pada ngresula. Semoga!