PNS jeung Honorer, Tanggung Jawabna Sarua Hakna Beda

"Bapak Ibu silakan cek rekening Neng Serti udah masuk" ceuk hiji ibu guru PNS dina hiji grup WA.

Saminggu sammhna, di grup WA nu sarua, aya pengumuman ti Bendahara Sekolah, "Bapak dan Ibu PNS TPP sudah cair, silakan ambil ke TU,semoga berkah"

Tangtu nu macana teh boh guru-TU PNS boh guru-pagawe honorer. Da sarua sagrup tea. 

Duka kumaha perasaan para kaum honorer macaan pengumuman kawas kitu. Da saenyana gajih-beubeunangan guru PNS teh lain bae gajih, lamun ditotal-total sabulan teh bisa narima leuwi ti tilu gajih: gajih poko, sertifikasi, Tambahan Perbaikan Penghasilan, tambahan ti sakola,jeung nu sejenna. 

Tangtu beda jeung guru PNS bareto. Eta kudu disukuran. Ciri nagara boga perhatian nu daria ka PNS kaasup para guru.

Alhamdulillah. Naon bae kudu disukuran. Komo keluarga kuring mah kaasup kaum guru. Lanceuk, mamang, bibi, alo,jaradi guru. Boh nu PNS boh nu honorer. 

Teu, teu aya saeutik oge cemburu sosial. Malah, miharep mah gajih jeung tunjangan para PNS kaasup kaum guru teh ditambahan tiap taunna.

Hal kitu teh dipihare para PNS leuwih rancage hade gawe. Leuwih getol digawena. Leuwih kratif dina gawe sapopoena.

Ngan bae, naon nu dicangking ku PNS jauh pisan jeung nasib pagawe honorer. Komo guru honorer di sakola swasta jeung sakola negeri mah. Jauh pisan. Loba deuh data jeung faktana. Tinggal mukaan Google, atawa lamun can yakin, hayu, survei langsung ka Bogor atawa Cianjur. Kuring siap nganteur. 

Lain bae soal penghasilan, tapi status pagawena oge teu saeutik nu teu jelas. Aya nu surat tugasna ti kapala sakola, aya nu ti bupati/walikota, aya nu ti yayasan.

Saba surat tugas ngan ti kepsek, nya iraha bae bisa dikaluarkeun.

Leuwih parnana, kaum guru honorer di sakola negri teh teu saeutik nu hese meunang NUPTK. Padahal eta guru teh geus ngahonor leuwih ti lima taun.

Ari NUPTK teh kawas NIK dina KTP mah. Tina NUPTK jadi salah sahiji sarat tina program program nu diayakeun ku Kemendikbud. Kaasup miluan sertifikasi.

Lebah dieu, perluna pamarentah nyiar solusi deui perkara nasib guru atawa pagawe honorer. Boh gajihna, boh status sarta nasib ka hareupna.

Solusi kawas P3K eta oge hade. Ngan bae kurang keneh sosialisasina. Atuh cara sejenna, pamarentah bisa rukun gawe jeung perusahaan nasional atawa darah, misalna. Ngaliwatan CSR dijieun aturan sangkan perusahaan bisa mere tunjangan tambahan ka pagawe atawa guru honor.

Da, ari lebah tanggung jawab atawa gawe sapopoe mah sarua bae. Babakti ka negeri, nyerdaskeun anak bangsa, tetep miharep jadi ladang ibadah.

Sakitu heula bae nya. Da ieu tulisan teh saenyana meunang masukan atawa curhat para guru atawa pagawe honor oge ti beda-beda daerah.

Mugia dulur jeung para sobat nu miluan tes CPNS bisa lalulus. Atuh ka kaum honor, mugi tetep sabar jeung istikomah. Kum ka sadayana, dina posisikumaha bae oge babakti ka negeri mah ulah pareum.

Mugia Indonesia enyaan maju.