Kaya biayasane saben bali nyambut gawe Mardi mampir pasar. Ananging merga dina iki dhuwite ya wes entek, terus sepedha motore diplayokke menyang ATM saperlu njikuk dhuwit.
Maklum saiki wes sasi Rabiulawal, akeh wong sing kagungan kersa. Sumbangan ya mulai akeh meneh.
La wong saiki wae wes ana uleman cacahe telu ki. Sasi apik biyasane ya akeh sing nggunaake.
Ana ngarep ATM ketulis katrangan menawa mesin gek rusak. Ya weslah. Kuciwa jane. Kamangka tanggale ya durung tuwa banget. Wah kudu golek-golek silihan iki batine Mardi.
Ing ngarep mesin ATM ana salah sawijining wong lanang kang menawa ndelok seka nyandhange sok golek sampah.
Bagor gedhe kang wes didondomi nganggo raffia ireng didelehke ana ngarepe anggone lungguh.
Dhengkul awit mau dipijet-pijeti wae. Mbok menawa dhengkule kesel utawa nembe lara.
Bola-bali dhengkul mau diurut-urut dhewe. Mardi nggatekke wong mau kanthi rasa welas.
Weruh kahanan kang kaya mengkono kuwi Mardi ora mentala. Arep ngulungi kok ora ana dhuwit babar blas ana dhompet ombok segeloa.
Gage wae sepedha motore diuripke mesine. Atine kaya dicacah-cacah.
Dheweke nangis merga kelingan bapakne kang wes seda kurang luwih nem tahun kepungkur.
