Siapapun tidak dapat lepas dari salah, bahkan cenderung keji dan aniaya. Bisakah kita membebaskan diri dari belenggu itu untuk meraih ketenangan hati dan keluasan hidup, menyambut datangnya rejeki, mendapatkan ampunan dari salah dan aniaya yang diperbuatnya, terhindar dari konsekuensi perbuatan ina, dan mendapatkan derajat yang tinggi setelah kematiannya?
Para kadang kinasih, sedaya pepuji awit saking bleberan peparingipun Gusti Allah ingkang arupi werni-wernining kanikmatan dhumateng kula panjenengan sedaya. Minangka wedharing raos syukur, mangga kula panjenengan ngindhakaken sesambungan wonten ngarsanipun Allah Azza wajalla kanthi ngindhakaken iman saha raos taqwa; ndadosaken saben obah lampah kula panjenengan mligi tumuju maring ridlanipun Allah. Shalawat saha salam mugiya tansah lumeber katur Rasulullah Muhammad saw., titah linangkung, minangka patuladhan, ingkang dados panutaning ummat sejagat mujudaken raos taqwa ing saklebeting gesang bebrayan saha ing saklebeting matrapaken yudha nagara.
Manungsa minangka makhluk ingkang nggadhahi akhlak, temtunipun nggadhahi kewajiban ingkang kedah dipunsembadani. Kewajiban kala wau nun inggih tumindak njagi akhlak sae saha nebihi akhlak awon. Kewajiban punika ingkang dados kekiyatan moral saking kaleksananipun akhlak ingkang sae sarta kalis saking tumindak awon. Tabiatipun manungsa nun inggih mboten suci saking kalepatan saha dosa. Ingkang maksum namung Rasulullah. Awit saking punika, rasulullah ngemutaken dhumateng kula panjenengan supados tansah nyuwun pangapunten sarta tobat maring Gusti Allah.
Para kadang kinasih, tobat saha istighfar punika minangka salah setunggaling amalan ingkang nuwuhaken ridlanipun Allah swt. dhumateng kula panjenengan. Senadyan toh Rasulullah Muhammad saw. sampun maksum, panjenenganipun tasih nyuwun pangapuntenipun Gusti Allah swt. Ing saklebeting sedinten panjenenganipun istighfar antawis kaping 70 ngantos dumugi 100 ambalan. Lajeng kados pundi mungguhing kula panjenengan ingkang mboten maksum? Gusti Allah swt. dhawuh ingkang tegesipun:
“He wong-wong kang padha iman, tobata sira kabeh marang Allah kelawan tobat kang murni, muga-muga Pengeran ira kabeh bakal nutupi kesalahan-kesalahan ira kabeh lan ngebokkna ira kabeh ing ndalem swarga kang ana bengawan-bengawan padha mili ing ngisore, ...” (At Tahrim/66: 8).
Kathah kapitunan jalaran saking tumindak dosa, ing antawisipun: nebihaken pitulungipun Gusti Allah, gesang ingkang mboten berkah saha mboten manfaat, ndadosake risakipun wewengkon ing agesang sarta kasangsaran, ati ingkang tamah sahengga angel nampi bebener. Ewa dene makaten, Allah swt. mratelakake dosa saha kalepatan saagenga punapa kemawon saged dipunpangapura kanthi cara istighfar. Allah dhawuh ingkang tegesipun:
“Ngamanga sira Muhammad, ‘He kawula-kawula Ingsun kang kliwat wates ing atasae awak ira kabeh, aja nganti sira kabeh mopo saka rahmate Allah.’ Saktemene Allah kersa mangapura dosa-dosa ira kabeh. Satemene hiya Panjenengane kang Maha Mangapura saha Maha Welas Asih” (Az Zumar/39: 53).
Jamaah jumah ingkang dipunrahmati Allah, istighfar punika minangka amalan ingkang kathah manfaatipun, sae ing ndonya tuwin ing akhirat. Sakmboten-mbotenipun wonten 5 (gangsal) paedah istighfar.
Kapisan, istighfar saged ngicalaken kesusahan sarta rupegipun agesang. Ing saklebeting riwayat Ahmad, Rasulullah saw. ngendika, “Sapa wonge kang ngokeh-okehi istighfar, Allah arep ndadekake kalonggaran saka saben kesusahan, lan wewengan saka saben-saben karupegan.”
Kapindho,istighfar inggih punika minangka faktor wigatos datengipun rejeki. Allah dhawuh ingkang surasanipun:
“Pramila kula andharaken dhumateng piyambakipun sedaya, ‘Nyuwuna pangapunten dhumateng Pengeran sampeyan sedaya, satuhunipun Panjenenganipun punika Maha Mangapunten, mesthi Panjenenganipun badhe ngintunaken jawah ingkang deres dhumateng sampeyan sedaya, lan ngathahaken bandha lan putra-putra sampeyan sedaya sarta ndadosaken kebonan-kebonan lan maujudken ugi lelepenan (ing saklebetipun) ...” (Nuh/71: 10-12).
