“Ieu téh tradisi nu saé pisan. Antara budaya sareng agama henteu pagedrug. Malah adumanis nu pikaresepeun. Seueur palasipah hirup dina Nyangku téh. Ku kituna, abdi miharep, tradisi Nyangku téh kedah didawamkeun sarta diwariskeun ka para nonoman,” Ceuk Imam Tunggara nu taun payun ngiring ngandidat dina calon anggota Déwan Perwakilan Daérah (DPD) RI nomor 57.
Sawirahma jeung Imam, Ketua Yayaysan Borosngora, Dr. Johan Wiradinata, M.Si, nyebutkeun, tradisi Nyangku téh salah sahiji syiar Islam. Ieu kagiatan téh, Johan nandeskeun, mangrupa tradisi turun-tumurun, kearifan lokal ti tanah Panjalu nu bakal terus dirumat, dipupusti.
“Nyangku téh tradisi mupusti sanés migusti. Ki kituna ieu tradisi téh teras évaluasi pikeun kahadéan ka payunna. Dina enas-enasna mah Nyangku téh pikeun meresihan diri,’ Ceuk Johan waktu biantara di Alun-alun Panjalu, (3/12).
Tradisi Nyangku ngagunakeun cai ti tujuh sirah cai, aya ogé nu nyebutkeun salapan. Éta cai téh meunang nguyang ti Sétu Léngkong, Kapunduhan, Gunung Bitung (Majalengka), Sindang Barang, Ciomas, Cilimus, Kubang Kélong.
Sabada dikumbah, pusakan téh dibawa ka panggung geusa digaringkeun ku cara dideang ngagunakeun haseup. Tangtu baé dipapaésan ku menyan. Geus tuus mah pusaka téh dibungkus ku kaén bodas jeung daun lontar. Réngsé sadayana kakara dibawa deui ka Pasucian Bumi Alit.
Djasépudin.
