[caption id="attachment_146914" align="aligncenter" width="576" caption="Kambingnye siap-siap dianter (dok.twitter @kandangsawangan)"][/caption]
Kudunye nih tulisan aye tayangin waktu lebaran Qurban kemaren, tapi karena aye lagi sibuk ngurusin pacar aye noh bang Vale yang punye name lengkap Vale Lo Vheyank jadi aye baru sempet nulis gini hari. Maapin ye mpok ame abang. Asal mulanye ane liat di twitter temen aye, die masang poto kambing nyang bakal dikirim ke pembelinye. Udah biase sih aye liat orang jual beli kambing, mpok ame abang pasti udah biase juga pan yak. Nah nyang bikin jual beli kambing ini bikin aye tertarik tuh care ngirimnye. Biasanye tuh kambing dibawa pake mobil pik ap kalo banyak. Banyaknye berape aye sih kagak pernah ngitung mpok abang, pan kerajinan amat ye aye ngitung begonoan, kecuali aye dikasih kambing satu bole dah aye itungin (ngarep amat inih). Ntu kalo belinye banyak, nah kalo belinye cuman satu atawa dua pegimane care kirimnye, kalo dibawa pake mobil pik ap juga pan berat diongkos ye mpok abang. Nyang murah ye pake motor. Tapi motornye jangan motor Ducati... same aje tuh mahal di ongkos juga. Cuman kalo kagak diakalin repot juga bawa kambing pake motor. Kudu berdua pan, kalo di belakang kagak ada nyang jagain ye bakal ngacir tuh kambing. Batal dah ntar bikin sate kambing. Temen aye nih nyang punye akun @kandangsawangan punye care buat bawa tuh kambing, dijamin kagak bakal ngerepotin. Mpok ame abang pan tau tuh kantong di belakang motor nyang biasanye dipake pedagang sayur kalo belanje ke pasar. Kantong beginian juga biasanye dipake ame loper koran. Tukang pos juga dulu pake kantong model gini. Kalo mpok ame abang bingung bentuknye gimane liat aje dah poto nyang aye pasang di mari. Nah kambing dimasukin ke kantong ntuh, lengkap ame rumput buat makanannye. Jadi tuh kambing kagak kelaperan di jalan. Ye kalo nganternye cuman ke pengkolan tempat aye biase ngojek (narik ojek maksudnye), nah kalo nganternye ke Bogor gimane? Kan kasian tuh kambing bisa lemes kelaperan. Aye mikir nih orang kreatip juga, kagak cuman mikir jualan doang tapi juga mikir gimane carenye tuh kambing nyaman di jalan waktu dianter ke pembelinye. Kayaknye nih orang emang tau dah hak asasinye kambing. Jempolllll hehehhe....
[caption id="attachment_146916" align="aligncenter" width="576" caption="Kambingnye nyaman di boncengan (dok.twitter @kandangsawangan)"][/caption]
Kudunye care begini ditiru tuh same orang-orang nyang suka bawa-bawa binatang di motor. Aye suka liat tuh orang nyang bawa ayam di boncengan motor, kaki ayamnye diiket jadi satu, trus kepala ayamnye di bawah, padahal tuh ayam idup. Mana jumlahnye banyak lagi, duile perut aye ampe mules liatnye mpok abang. Kasian bener tuh ayam. Katenye orang nyang ahli nutrisi, aye lupa sape namenye, makan daging nyang binatangnye setres kagak sehat mpok abang. Kalo care bawanye kayak ayam nyang ditumpuk ntuh, aye yakin dah tuh ayam pada setres. Lagian nyiksa binatang pan dosa ye mpok abang. Balik ke poto kambing nyang aye pasang di mari, jangan-jangan di tempat mpok ame abang udah biase ye ame beginian, kalo iye maapin aye deh mpok abang, aye baru liat nyang beginian. Aye jangan ditimpuk pake gilingan kambing ye, ntar aye bales timpuk pake gilingan pik ap. Salam timpuk. Note : jiaahhhh bang admin... ngapa dipindah ke sosbud nih tulisan.. kan beneran nyang tadi... rubrik kesehatan soalnye ini nyangkut kesehatan kambing
