Inna Lillahi Wa Inna Ilaihi Roji'un, Terdengar kabar atas kepergian orang yang aye Cinta, teman aye ngobrol bertukar cerita dan bercanda, Almarhum Zaenuddin (Bang Udin) semoga Allah melimpahkan Kasih Sayang padanya. Waktu menunjukkan Pkl.11.30 WIB. saat aye tarik gas motor menuju kediaman bang Udin, yang kebetulan tetangge dari Bang Irzi, untuk melepas kepergiannye untuk terakhir kali dengan mensholatkan jenazahnye. Sampai di depan gang rumah Beliau, aye bertanye ke penjaga keamanan lingkungan, "Pak, Bang Udin di sholatinnye di Mesid mane ? ." "Orangnye baru aje selesai di kuburin, tadi jam sepuluhan." jawab pak penjaga keamanan yang kurang muasin hati aye, aye terlambat, kecewa ame diri sendiri yang gak bisa nyari informasi dengan tepat. "Ahh, udah tanggung ada di mari, mendingan aye maen ke rumah Bang Irzi, katenye kan die pere, barangkali aje ade sesuatu yang nggak keduge di tempatnye." batin aye berbisik coba ngalahin teriakan kekecwaan di hati. Emang bener ape kate Tuhan dalam Firman-Nye, "Bersame kekecewaan entu ade kepuasan". Rupanye di tempat Bang Irzi lagi ade tamu istimewa, Bang Lukman alBatawi Sepri, temen aye ngakak di Cermin. "Assalamu 'alaikum. " salam aye. "Wa 'alaikum salam, ente siape, utusannye Rusdi Ahmad ?" Tanye Bang Irzi becande. "Aye Rusdi Ahmad bang, kan utusan aye lagi di tahan ame Bang jampang." Ujar aye bales candaan bang Irzi. "Dari mane ente ?" Bang Irzi nanya ke aye lagi. "Niat aye tadinye mau ikutan nyolatin bang Udin, eh udah di kuburin " Terang aye. "ente mah terlambat, tadi jam sepuluhan aye aje baru pulang nguburin." bang Irzi ngomentarin keterlambatan aye. "bang Lukman, kenalin nehh, eni bang Rusdi Ahmad yang suka ketawe doangan di Bp, kemarenan die kemari waktu aye lagi gak ada, ngakunye di utus ame Rusdi Ahmad, udah gitu lagaknye kayak bukan orang bener, omongannye di gagapin, tampangnye di blo'onin, ame entu tuh, tangannye di kiting-kitingin, ampe bini aye ketakutan." Cerite Bang Irzi yang udeh kayak si "jait" dengan candaannye. Suare ketawe meledak dari bang Lukman, aye, mpok Piah, yang paling gede suaranye mpok Piah. Selagi kami ngobrol, Pok Piah nahan ketawe, acap kali beradu pandang ame aye di ketawe, kenape seh pok, masih kebayang waktu aye pertame kali dateng ye? haha sama Pok, aye juga masih geli banget ngeliat Pok Piah ketakutan waktu entu, cuma aye rade pinteran ngumpetinnye. Tapi kan sekarang Pok Piah udah tahu kalau sebenernye aye orangnye baik. "Tapi gak di sangke ye Bang Ir, biar kadang - kadang cuma ketawe doang, tapi tulisan cerbernye banyak yang suka, haha." Bang Lukman muji aye di depan bang Irzi, Pok Piah juga nambahin, "Iye Bang Rusdi, banyak yang demen ame cerbernye tuh, Pok Diah, wah kalau bang Idham ketemu ame Bang Rusdi bisa di tegreb ente bang, bininye ngefans banget ame abang. " lagi -lagi kami ktawe ngedenger Pok Piah bicare soal Bini Bang Idham yang ngefans ame aye, tapi semuanye aye anggap cuma banyolan aje. "Rus.., entar ikut ye ke tempat Pok Diah, die nanyain melulu tuh, Bang Rusdi Ahmad orangnye ade ape nggak sih ? saye jawabin begini aje : saye udah suruh Agus buat ngelacak, katenye orangnye beneran ade kok, pok Diah. Nah, kalao etar ente ikut kan pok Diah jadi bener puas tuh. " kate Bang Irzi, ngajak aye ke tempat Pok Diah, aii ih Pok Diah merhatiin aye. "Emang rumah Pok Diah dimane, terus ade acare paan Bang Ir ?" Tanye aye "Di Pamulang, kite merapet aje buat bahas teknis acare santunan anak yatim di ragunan." jawab bang Irzi."Iye dah aye ikut" Aye ngacungin jari. Di sela - sela kami mgobrol, terdengar keras suara burung cabe - cabean berkicau, "Cuaaat...cuiiit...., selamet Ulang Tahun." Suare burung cabe - cabean yang unik, sedikit bindeng (mungkin ngeluarin nafasnye drai hidung), tapi merdu banget. kalau aje tuh burung bisa lagu Nahawan atau sike, pasti udah laku buat bawain ayat Qur'an di acare Santunan yatim. Suare burungnye nyaring banget, sampe satu Rt orang - orang pada denger die berkicau. Gara - gara suaranye yang merdu atau gara - gara entu burung, saudaranye pak RT ye jadinye para warga enggak ada yang protes. "Nah entu Pok Ria, maklumin aje dah kalau suaranye kayak burung cabe - cabean. Die mau ikut kagak ye ke tempat Pok Diah, Pook...Pok Riaa..kemari dah." bang Irzi ngenalin Pok Ria sambil manggil dengan berteriak. yang di panggil langsung nengok lalu nyamperin kami yang lagi ngumpul. Kalau beneran burung, pasti harganye mahal, udah suaranye mahal, ngerti banget lagi, ternyate die mpoknye Bang Irzi. "mpok Ria, kenalin eni yang namanye Rusdi Ahmad, si 2 huruf, "H ame A", bang irzi ngenalin mpok Ria ke aye. Sambil nyodorin tangannye, mpok Ria memperkenalkan diri. "Ria Anzely, ehh...kayaknye pernah kenal deh." Mpok Ria sok kenal ame aye, aye aye timpalin dah, "Iye bener, aye juga kayaknye sering ngeliat mpok.""Di mane ye ?" tanye mpok Ria."Mpok yang suka mondar - mandir di jalan Raya kan ?" jawab aye bercande. "Enak aje emang eke tukang parkir." Lagi - lagi rumah bang Irzi rame dengan suara ketawe kami. Tadinye bang Irzi mau nanya ke Pok Ria, kalau si mpok mau ikut ke Pamulang ape kagak, tapi yang mau di tanye udah keburu masuk ke dalem rumah bang irzi sambil berdendang, pas keluar lagi mpok Ria bawa bungkusan teh hijau, yang sebagian isinye berceceran di ubin, bikin Pok Piah jadi ngedumel aje. kalau di perhatiin se ksama, pok Ria entu orangnye manis, rambutnye di warnain kuning kemerahan nunjukkin bahwa Pok Ria berjiwa muda. Bibirnye yang di poles gincu merah udah kayak buah ceri merah, ngebikin nafsu pemuda buat ngegigitnye, riasan mukanye juga bagus, die emang pinter banget ngedandan. Pokoknye gak malu - maluin kalau buat di ajak ke acaranye Bang Idham atau ke Ragunan, haha. "Mpok Ria, mpok mau ikut hagak ke Pamulang ?" Tanye Bang Irzi."Owh.. tentu dong eke mau" jawab mpok Ria centil. jadi gemes aye, pengen rasanye nyentil hidungnye yang bangir. "ya udah sana siap - siap, orang perempuan kan lama dandannye, Piah kamu juga dah sana, kalau saye mah gampang tinggal ganti baju doangan jadi." Bang irzi nyuruh mpok Ria ame Pok Piah buat siap - siap. Sementara mereka berdua dandan, aye , Bang Lukman ame bang irzi ngelanjutin ngobrol ngalor ngidul. "Wahh...Weewww ...wowww." kagum aye ngeliat Pok Piah ame pok Ria berganti penampilan dengan berkerudung, keduanye tampil anggun banget. Apelagi mpok Ria Anzely, kerudung hitamnye udah nonjolin keanggunannye, kalau aye perhatiin mirip anaknye Hj. Elvi Sukaesih. "nyokk berangkat." kate pok Ria. "bentaran dulu nungguin bang hamdani Jenggot sempong, entar kalau di tinggal orangnye marah." Sahut Bang Lukman. Di saat kami menunggu bang hamdani, mpok Ria pamitan ame enyaknye. "Nyaak...Ria pamit dulu mau jalan, doa'in biar dapet jodoh." Mpok Ria pamitannye pake teriak, tapi dari situ aye bisa ngeliat ada keakraban antara emak ame anaknye. Si enyak nggak ngejawab, diem aje. malah ke luar dari rumah, berjilbab rapih, sambil nyeletuk, "Emangnye yang muda doang yang kepengen jalan, aye pan juga mau." Celetukan si Enyak bikin aye ketawe geli banget, hahahaaaaaaa. Gak lama kemudian bang hamdani nongol, rupanye die habis pulang kerja di Tebet langsung kemari. Tanpa banyak ngobrol lagi kami nyalain mesin motor berangkat menuju Pamulang, berkonvoi tiga motor. Yahh Pok Piah dah ah, ape yang ketinggalan lagi sehh, tadi mpok Piah yang ribut, jalannye lama banget, kapan berangkatnye, keburu sore, tapi sekarang mpok pake aca re kelupaan sesuati lagi, hmm. Tapi yarin d ah, bukannye nambah lama berangkatnye nambah asik perasaan kangen di hati akan pamulang, TUNGGU KAMI VILLA DAGO.___ nancy ajram mp3 | nancy ajram lyrics free music downloads | music videos | nancy ajram pictures
