Hana nguni hana mangke
tan hana nguni tan hana mangke
Aya ma beuheula aya tu ayeuna
hanteu ma beuheula hanteu tu ayeuna
Hana tunggak hana watang
tan hana tunggak tan hana watang
Hana ma tunggulna aya tu catangna
Dibandingkeun jeung kabudayaan Jawa titinggal sajarah jeung kabudayaan winangun benda, Sunda mah masih kawilang jarang. Upamana, di Jawa masih rea mangpuluh candi nu ngajungkiring ngajul langit turta diwewegan ku ngadegna karaton nu tepi ka ayeuna masih karasa dangiangna, nya artefak di tanah Sunda mah salian jumlahna saeutik, dina ayana ge dilurjeunkeun alias diapilainkeun. Malah, teu saeutik nu dimusnahkeun.
Urang tangtu masih inget kana kasus Batutulis, taun 2002. Dina papayung koordinasi pajabat tingkat mentri, dumasar kana harewos sakadang dukun, situs titinggal karajaan Sunda di Batutulis, Bogor ngahaja diruksak kalayan alesan nyiar harta karun nu cenah ngagunduk di handapeun prasasti.
Memehna, masih di Bogor, taun '90-an, turta masih titinggal karajaan Sunda (Pajajaran), situs Badigul di lelewek Rancamaya, ngahaja diancurkeun geusan ngadegkeun perumahan elit. Harita, urang Sunda ukur bisa nyeungceurikan nasib diri, alatan teu wasa nyanghareupan rezim otoriter jeung telengesna para pangusaha.
Gedengeun ti eta, pasir jeung gunung kapur di wewengkon Padalarang Bandung, nu dierong mangrupa titinggal kabudayaan jaman beh ditueun bihari (pra sajarah) tepi ka kiwari hantem digorogotan ku mangpuluh-puluh mesin.
