Mabela ri Wattang, macella Matanna Essoe ri linrunna allung manipi. Engka sirombongeng campong luttu rewe' ri sarenna. Cenga i Lakile makkita ri langi'e. De'pa gaga tanra-tanrana melo turu' bosi e matu' ko bajai, yare' gi ko wenni. Mallesse, tana e ri galungnge. Dua ni tedong na Kapalae, Pup Punna polo ajena nala lesse' tana. Tellu mpulenni namo to si tetti wae bosi turung de' to gaga, nataro serrang.
Gilingngi makkita ri ledengnge, maka nessa paita ceppe'-ceppe' e mallaga sibawa bale ogi e sipulung ri sebbo-sebbo e pappada ko yattungkat taro. Wae ledengnge tellu mpulengnge labe' e, massolo' na maka cinnong. Makkokkoe, pappada mani benrangnge penno lunnya'. Tassiddi-siddi mani paita sebbo-sebbo, na pennoi bale.
"Allahu puangku, paccallang aga Mu pakengka kasi' ri wanue. Aga na kasi' nakkatuoi atamMu ko toli serrammi makkoe" metto' ri laleng atinna, pappada to ko nasesse' i alena toli monromi mattajeng bosi, nade' isseng panna pole. Taun riolo, situju-tuju bosi e wettu mattanengngi tauwe, nomo to makkowairo ri wettu mappammulai mellise' asena, nalai cella' pance'. De'na genne' seppulo wesse ise'na 'Lakawu-kawu' siddi hetto loanna. 'Lakawu-kawu' aseng pattelerenna ganunna Pup Punna ri Kaboe, Kulo. Siddi-siddinna galunna Pup Punna ri Kaboe. Ia tona ro wedding na pammanareng lao okko siddi-siddinna ana' aroane na ri tella e Lakile.
"Kile.... o.. Kile, labuni essoe na'. Tollisuna, mapettangngi matu", takkitte' Lakile igorai asenna. Gilingngi mitai ambo'na. Jokkani Pup Punna tottongngi bingkunna leteii pitawu mangolo ri bolana. Makkalurung ajena nataro pella esso, de' na pada tellu mpuleng labe'e, na doko' bungka, menre' ri pitawu e, nappa no lore' ajena mabbise ri wae mallojangnge, lojangngi ajena.
"Lao are' ga' sompe' mbo...." mappammula adai Lakile ri wettu tudanngi manre sibawa ambo'na.
"Meloko lao kega?" mette'i PurRiwu, baene na Pup Punna, Indo'na Lakile.
De' gaga mette'.
"Jaji, moloko salaika'? Baenemu.... ana'mu....?" mabbalulu' pakkutanana PurRiwu.
Cuku'mi Lakile mitai wette bale ceppe'e, natikkengnge ri ledengnge onna' esso e. Tassiseng-siseng na timpu nanre gesara'na, samanna mattawa lima gesara'e, siddi werre'na. Macella pada tana tappa purae lae peppe'peppe'. Meloni yaga, mapeddi'i werre' e.
"Em....meloka' lao siwali'. U rencanai bawa i manittutta sibawa appota".
De' naseddingngi maddunu wae matanna PurRiwu massolo' pada wae bosi e. Bosi ri matanna de' mo na melo mancaji bosi ri galungnge. Samanna nasedding lai sitta' nyawana mangkalingae adanna ana' aroanena.
'Tongggh....tongggh...tong
gggghh..', bekka tellu moni gandongnge lai tette' lappa ri bola rondangnge.
"Ah... tette telluni, mhh", laleng atinna. Denniari ni de'pa na maelo lennye paringngerranna, matinro. Purasi napikkiriki, napikkiriki mosi. Massiddi ni atinna, na pallebu pakkelorenna. Ada-ada mi na to tau. Riolopa na riolo, ko engka na puelo, naggangkullei nalolongeng. Ko makkakdai pute, pute polena, ka makkadai celle', cella jajinna. De'na gaga parellu lai pikkirisi, de'na gaga wedding matteangngi. Dua tellu esso matu', jokkai lao Pare-pare tonang lopi, sompe lao siwali', kamponna tauwe.
Sitongenna duam penni labe'e, purani sipekke ipana tella e La Suebe', Laburoncong sibawa Lanure'.
"Daeng, aja' tallupaika ko jaji ki' lao siwali' ", naingngerrangngi pasenna Wa' Ali.
"Taro moi irita matu', esso Araba' pi nai tanai juragangnge, makkada siaga ni lurenna lopi e. Insya Alla, ko weddim mopi accio mokki' ", jancinna wettu e ro.
