Sudah  kayak biasae,  lek malem minggu  Sinyo apel pigi romahe Nonik. Sinyo wes ada piro minggu  ini ngebet soro ambek Nonik, cewek sing kuliah  sastra enggres petra ini memange ciamik, kulitane merah gosong dikit kaya agnes monica, terus rambut ya di semir rodok merah persis girlband korea, mana anake pinter , keluwargae ya sogeh, wong romahe aja ndek manyar kertoarjo. Mana Nonik ini anak wedok satu2ne. Sodarae Nonik  ada dua laki kabeh, sing besar dewek  sekolah pigi kanada, satune lagi sekolah pigi  ostrali. Lha Nonik karena wedok dewek, ndak usah sekolah jauh wes, wong suruh jaga toko ya rodok aras2en, lha yak apa wong ngalem soro arek-e.
Sinyo mestine sudah lama ngesiri Nonik, kait semester sing lalu, cumak-e tahune Sinyo, Nonik dulue yayange David anak ekonomi ubaya.  Mangkane tahu David jauh dari Nonik, langsung ae wes Sinyo nemploki Nonik. "Uoa aini Nik, . . . . . ." .  Nah sekarange  mereka wes jadian, Sinyo berusaha yak apa carae Nonik bok sampe lepas. Sinyo mesti rajin nyambangi Nonik, nganterno Nonik saben ari kemana aja sak maune Nonik pigi mesti  dianterno. Pigi greja, pigi ke mol, nyalon, pigi kuliah Sinyo setia nganter.
Keliakane papi mamine Nonik ya seneng ambek Sinyo, anake keliakane baek,  gak tapek ganteng tapi-e ya gak mbojai2 soro, terus  anak-e sopan, mobile ya baek, mangkae papi mami ini rasae aman lek anak perempuan satu2 ne ini saben  ari disambangi Sinyo, apalagi ndak  perlu ongkos kerja Nonik jalan2, wong dikawal terus ambek Sinyo. Jien sangune Nonik isa ditabung kerja keperluwan laine. Lumayan pikire mereka. Cobak-o sangu saben arine piro.
Malem ini  rencanae Sinyo meh ajaki Nonik liak biskop pigi mol galaksi, mau liak pelem ndek sineplek ndek  lantai  mol seng paling tinggi dewek.
Sakbelone liak felem  Sinyo ajaki Nonik ciak ndek G- walk. Emange jauh soro tempate G-walk ambek galaksi mol, kayake mereka sengaja biarno kiya2ne isa jauh terus  lama. Maklum galaksi mol kan cuma  clekutek deket soro ambek romae Nonik, palingo cuma sapek meter, lima menit aja wes nyampek.
Malem minggu gini g-walk rame ndak kira2 wes, meh parkir ja mesti muter2 piro kali baru isa markir. Ndek sana emange banyak pilihan segalane macem makanan ada, kali ini mereka meleh ciak stik model holan. Jadi ne makane isa lama, ambek ndengerno musik.Romantis.
Mari gitu pasangan ini jalan arah mol galaksi, lewat jalan h r muhammad. Jalan ini malem minggu ini macet soro, amper ga gerak blas mobile Sinyo. Padahalan sudah jam delapan lebih amper setengah sembilan. Kwatire Sinyo entik  Nonik marah karena telat sampek gedong biskop, soale  ngliak Nonik mulai diem ambek kakine gedrug2  gitu Sinyo tambah grogi, gobyos. Tapi ya mau yak  apa lagi, emang jalane padet. Nyambung ke jalan may jen sungkono macete di bunderan satelit tambah nemen. Kondisine dalem mobil tambah ndak ada mesra2ne blas wes, Nonik mulute tambah mecucu thok ae.
CeritaNE,  sampek di mol galaksi sudah  amper  jam setengah sebelas. Biskop dah kait tadi diputer, lokete juga sudah tutup, lampune loket, lobi sudah  gelap. Tinggal ada sekuriti mol aja yang jaga ndek deket pintu toilet.
Nonik seng emange anak manjane pol2an, kait di jalan tadi diem aja ambek bibire mecucu,  sekarang tambah marah, polahe  mereka telat nyampek sineplek. Mana malem ini film favorite Nonik terakhir main, jadi ndak isa di  liak besok2 lagi. Wah yak apa, entik ari senin Nonik ndak isa pamer crita ke Sinta hopinge ndek kampus.  Mangka-e Nonik marah soro ambek pacar barune ini : " lu kok geblek soro sih Nyo, nyopir e kamu  nggremet kaya bekicot, yak apa ini ndak jadi liak, aku ndak isa omong2 film ambek Sinta entik, malu aku NYO, aku kadungan pamer ambek Yek ling, ambek Vero , . . . . . . . . . . . .".
Nonik  mewek, wes  . . . . .  Sinyo tambah bengung, dia baru tau nek Nonik marah jadine kaya anak kecil gini. Sinyo ndak ngira Nonik jadi kasar ambek ndak mau liak kanyataan-e, padahalan tadi mestine Nonik tau to nek jalane macet, masio Schumaker aja ya pastine ndak isa ngebut lek jalane macet gitu. Waduh mahasiswi kok lek marah jadi anak kayak anak  plegrup gini.
Akhire ambek misik membik2 Nonik maksa ngajaki pulang. Sampek depane rumah, satpam buka  pager,  Nonik langsung aja lari masuk romah, Sinyo yang bengung ditinggal dewek ndek jalan, dia cobak2 mau masuk romah, ndak bolih  sama satpam. Yawes, Sinyo nunggu ndek daleme mobil, sambil nelpon2 pigi hape ne Nonik, tapi rupane hape ndak dinyalakno.
