Wes suwe Yeti ora nate ketemu mantan. Ya sawise janji bubaran kira-kira rong tahun kepungkur merga ora disetuji karo wong tua loro-lorone. Embuh angin apa sing nggawa Yeti kudu kelingan mantan.
Mungkin akeh barang-barang sing biyen nate diwenehke marang deweke, lan sengaja ora kepingin dibuang. Eman-eman sajake, masalahe akeh kenangan manis saka barang-barang mau.
Saiki loro-lorone wes ora nate kabar-kabaran, dadi ora pada ngerti kondhisi lan mapan ana ngendi. Mbok menawa saiki mantane Yeti wes duwe ganti. Utawa malah wes nikah dhisik. Blas ora ana kabar bab deweke. Mungkin sengaja arep nglalekke Yeti. Yeti dhewe saiki ya wes duwe sisihan, lan anak lanang siji.
Sesrawungan karo Ratno wes lumayan suwe kira-kira limang tahunan nalika  kelas 3 SMA.
Pancen ya hubungan sing suwe kuwi ora njamin terus iso tekan nikah. Akeh sing ming sesrawungan telung sasi, terus nikah. Ananging ya ana sing wes suwe banget malah ora lek nikah-nikah, akhire nikahe malah karo wong liya. Ah, melas banget.
Embuh seka ngendi Ratno ngerti nomere WA Yeti, kok iso nelpon. Yeti kaget setengah mati krungu suarane. Sajak kenal suarane, ning sapa deweke capet-capet lali. Sengaja Ratno gawe penasaran Yeti sing telpon awan-awan pas jam ngaso siyang.
"Asalamualaikum," salame Ratno mulai telpon.
"Waalaikum salam warohmatullohi wa barakaatuh, niki sinten nggih, kula kok rada supe," Yeti mulai penasaran karo suarane Ratno sing pancen rada seje apa mungkin digawe rada seje.
"Hhhh ... lali pa karo aku, apa sajak nglali ya, merga saiki wes dadi wong sugih," guyone Ratno marang Yeti.
"Ah sinten to niki, nek boten blaka ajeng kula tutup lo," Yeti mulai ngancam.
"Oalah, Yet ... Yet ... kok kejem to sampeyan saiki, apa merga wes duwe bojo sing ngluwihi aku ya," sambunge Ratno.
