Suguhane Calon Mertuaku

Malem minggu utawa weekend iku dina sing paling ditunggu-tunggu. Piye anggone ora seneng? Dina-dina sadurunge wis kanggo nyambut gawe mula pancen malem minggu iku wektu sing paling penak bisa pethukan karo pacarku, Nadya.

Aja ngece aku sing durung ngrabeni Nadya. Pancen anggone sesambungan wis uda kara 3 tahun. Kawit wisuda kuliah nganti seprene. Ananging aku lan Nadya durung nduweni niatan rabi. Ijik padha dene seneng dolan karo dhewean. Yen kesusu arep ngoyak apa, yen alon ngenteni apa? Anggere ora kebangeten lan ora nyimpang. Itung-itung bisa kanggo maremake dolan. Kanca-kancaku sing wis rabi wae akeh sing omong marang aku supaya ora perlu kesusu rabi. Dimaremake anggone dolan lan nyambut gawe dhisik.

Ibuku katon gumun karo aku sing madahi terang bulan sing mung kari seiris. Terang bulan kuwi tak wadahi plastik banjur tak selehake sak jaket.

"Ivan ki nang omahe Nadya nduwe ingon-ingon tikus apa piye ta? Kok saben mrana nggawa panganan diselehake sak." Mas Candra, kakangku uga gumun. Ananging anggone padha takon ora ana sing tak tanggepi. Yen tak critani apa anane bisa dadi perkara. Dasare kuw wagu!

"Dek, aku arep dolan. Neng nyuwun tulung aja disuguh singkong keju!" pesenku marang Nadya.

"Aku wegah yen disuguh singkong keju!"

Nadya nduwe kucing cacahe telu. Saben ana wong memangan, utamane singkong keju, kucing kuwi marani banjur njaluk diwenehi. Ora tanggung-tanggung kucing telu iku bisa ngentekake singkong keju sepiring. Sing gawe aku sengit, kucing kuwi mau banjur lunga klepat lan sidane aku dhewean sing nanggung isin. Bapak Ibune Nadya mesti mbatin calon mantune nggragas kliwat kaliren. Kuwi sing gawe aku ngira Bu Mustika banjur arang anggone nyuguh singkong keju. Wooalah ....

"Aku wegah yen disuguh tahu goreng!"

Gorengan, utamane tahu isi pancen paling enak menawa dipangan lalap lombok utawa sambel. Sing gawe aku gething yaiku Bu Mustika ora tau menehi lombok lalapan. Tahu yang mung tahu thok. Kamangka aku ora bisa mangan tahu lan gorengan yen ora dilalapi lombok. Menawa ora ana lomboke mending aku ora sida mangan. Pekok! Ananging caraku mangan gorengan pancen ngono kuwi.

"Ibumu ki saktenane ming arep gawe aku mangkel ta, Dek!" kandhaku karo hambegan landung kelingan suguhan duren glundungan ananging ora disediani lading. Nadya dhewe ngerti yen aku seneng banget karo duren. 

Dheweke mung ngguyu kemekelen weruh aku nesu lan misuh-misuh merga ora sida mangan duren gratis. Kanggo tamba gela, Nadya tak ajak tuku duren sak mareme ning Kalibawang.

Saktenane serba salah. Aku iki ibarate mung tamu, durung dadi anggota keluarga utawa sisihane Nadya. Mula aku kudu mangerteni ora bisa sakarepe ana omahe Nadya sing ana wong tua lan adhine. Jan-jane suguhane Bu Mustika enak-enak ananging ora meneri atiku wae. Mesti ana kedadean sing nyleneh. 

Embuh kuwi kucinge sing melu mangan, pacitan sing kangelan ngonceki kathik kulite kandel. Lha ana wong kok disuguh duren glundungan karo jeruk bali. Gek glundungan kaya ngono ya ora disediani lading. Lhah jane piye?

Aku wis tau nggawa panganan saka ngomah utawa tuku ning ndalan. Ananing Bu Mustika lan Nadya menging kareben aku ora dadi repot. Ngendikane yen aku mara ya sing disuguh aku, dudu aku sing nggawa pacitan. Kathik Indra, adhine Nadya yen weruh aku nggawa bungkusan sajake banjur kepo. Mripate mendelik ngenteni kreseke dibukak. 

Menawa ora enggal dibukak, adhine bakal polah. Dheweke caper karo ngganggu anggonku omongan karo Nadya. Gelem ora gelem bungkusan iku kudu dibukak. Ora perlu takon! Indra padha kaya kucinge. 

Menawa seneng karo jajananku, kabeh dipangan Indra. Aku karo Nadya sidane mung wedangan. Ya mung wedang putih kaya adate. Mula saka kuwi aku mesti sedia panganan sethithik ana sak lan mangan sega sadurunge mangkat kareben ora kaliren nalika apel Nadya.

Kelingan mbiyen pisanan sowan, aku ora disuguh apa-apa malah didhawuhi apek rambutan lan pelem dhewe ana wit. Mbuh karepe Bapakne Nadya, aku dites bisa menek apa ora, seneng colong jupuk apa ora. Rambutan sing gumandul cerak jendela kuwi ora tak jupuk blas. Sajake bapake Nadya sadurunge aku teka wis ngitung rambutan iku cacahe ana pira. Menawa kelong berarti tak jupuk, semono uga yen wutuh berarti aku ora nggagas rambutan kuwi.

Saktenane cerita iki saru lan wagu. Aku uga ngerti. Ana wong kok nyeritakake suguhan pacitan nggone omahe pacare. Ananging aku mung pengin cerita wae. Ndelalah calon mertuaku pancen wagu anggone suguh pacitan.

Aku disuguhi pacitan apa wae gelem. Arep diwenehi jagung bakar, telo godhog nganti jenang pati garut bakal tak tampa. Geneo aku wis oleh anak wadone sing ayu dhewe, sing bisa gawe atiku ayem tentrem. Nadya, kenya siji-sijine sing banget tak tresnani.