Awal taon lalu berita korona lah banyak, tapi masih belom bikin panik nian "Ai...di Cino sano, jaoh dari Plembang. Belando masih jaoh" maish amanlah isi omongan di WAG. Katek yang nak nakut-nakuti sampe ado berita nyebar ODP Korona di Plembang.
Nah mulai siru singgonyo, segalo isi WA sebarke infonyo, pecak petatuan pecak kepakaman lah tau dewek, ngecek idak bener apo idaknyo. Pokoknyo sebar, gawe buyan cerudikan dak keruan podio hasil. Berita bohon ruponyo negatif, data wong lah kesebar galo.
Lanjut waktu ado yang mati pulo duo di Plembang, nah parah nian yang ini. Makmano dak nak nyemulung sikok dokter kepala rumah sakit pulo sikok tetanggo dekat. Pecah utak lantak nerimo telpon nanyoke keadaan kito.
Woidah bukan dak seneng ditanyo kabar, tapi tadinyo dak kuatir jadi mati ketakutan lantak nasehat kamok yang pecak pakam nian tuh. Huft besokor bae kompal nih ado dokter yang galak ditanyo-tanyo, jadi pacak lego dikit lantak berita  dak keruan-keruan nih.
Tapi laju punyo penyakit baru, segalo hoax aku ngegas. Berijolah nak diangggap apo. Hoax yang terus dibumbui oleh cerito ngarang akal kendak-kendak dewek, yang lebih siru dari baco roman bikin tambah mati ketakutan.
Hoax disebar, tapi gawe dak bener digaweka bae, tekak bantah nian. Di katoke mantap-mantap bae dirumah, kelayapan. Becarian segalo pemutih, minyak kayu putih campur-campur buat disinfektan.
Padahal kalo lah dicampur woi baunyo nyegrak idung, malah biso sampe sesek dado. Pokoknyo tebaco segalo pembunuh kuman dibuat dewek.
Semprot di segalo tempat sampe tebadan-badan disemprot jugo.
Woi dah... meski samo-samo buat munuh kuman, tapi beda  untuk barang dengen untuk badan, disinfektan apolagi yang basing bae mun keno mato apo luko yang tebuka dem lah. Dak keno selaput lender bae bahayo. Â
Lah disinfektan yang resmi bae dak dibolehke WHO, itu nah badan PBB yang ngurusi kesehatan dunio lah ngelarang. Disinfekan memang bagus buat pencegahan barang-barang, tapi jelas bukan buat badan.
Tedenger alcohol pacak munuh kuman, nah balak lagi sengajo nenggak Topi Miring cs, alesan nian awak pengen mabok.
