Skarang banya yang kurang bangga jadi anak petani, kalu depe tamang tanya ngape orang tua karja apa?
keinginan hati suka mo jawab, Petani, mar, lantaran gengsi paksa badusta, Padahal nyamo dosa kalu jawab apa adanya
Padahal kalu mo jawab jujur p dorang, kong torang kase mangarti, kalu petani itu banya skali depe sumbangsi pa torang pe Negeri, pasti dong mo mangiri kong mo langsung badiri angka topi for tong pe orang tua yang Petani
Nyamo mangiri bagimana, kalu torang bilang pe bangga jadi anak petani karna gara-gara petani dorang pe org tua yang kaya itu, boleh mo dapa sua nasi kadalam puru.
Bayangkan kalu nya ada petani, kira-kira ngoni yang kaya itu mo makang apa?
Cuman kamari-kamari ini kita sebagai anak petani sadiki kurang hati pa tu orang-orang kaya yang so mambuta nintau manusia
Jatah for mo tunjang akang petani pe proses bertani supaya panen masi mo banya hasil, samua so jadi proyek.
Kalu nyanda basudara deng orang dalam, nyamo dapa itu bantuan mo pake di kobong,
Kalu nyanda ada uang muka jang harap dapa jatah.
Sebagai anak petani yang tau diri, torang yang skarang dorang ada kase skola tinggi-tinggi jadi mahasiswa, datang kamari bukang cuman mo ba kase gaga lipstik kong angka garis kining tinggi-tinggi, Kase gaga kameja deng calana merek.
Torang datang kuliah, supaya tu orang kaya yang nintau diri, dari mana dorang dapa makang nasi di piring, bole mo ba kira, kalu anak petani bisa jadi manusia yang tau manusia.
Jadi Anak petani sungguh mati kita bangga!
Karna dari petani ngoni boleh ba kaca dorang pe kesungguhan kase makang ini Negeri, tanpa pamri.
Anak petani hari ini sebenarnya musti lebe peka dengan situasi skarang ini, di mana sawah sadiki kasana so mo jadi  bangunan-bangunan pabrik oligarki.
